Komo fue dicho en mi artikolo de la semana pasada, los elementos prinsipales de los kualos la asimilasyon es echa son : el Olvido, la Hibridasyon, la Absensya de real Identidad i la Kulpabilidad.
El olvido: En efekto para kualkyer humano, la asimilasyon es antes de todo un djenero de voluntad de liberarse de todo lo ke konserna su orijen i su propyo pasado.
‘La persona asimilada a una otra fey ke la de su nasimyento’ se esforsa de echar de su memorya el rekuerdo de sus raizes i partikularmente de sus tradisyones . Si se trata de un ijo de Israel, el munchas vezes kere olvidarse tambyen los linguajes djudyos ke el tuvo la okazyon de oyir en su ninyes (hebreo, yidish, djudeo-espanyol, haketia ets…) i mizmo envezes el dezea olvidarse su propyo nombre de nasimyento.
‘El asimilado’ nyega fatalmente la valor de su kultura etnika ke el konsidera komo kaduka afin de mijor valorizar la del payis ande se topa.
La hibridasyon: Ma,’El asimilado ke era djudyo’ no puede todo efasar de su orijen, syempre kedan trasas de su pasado; ‘el asimilado’ es para Kafka una kriansa mitad Ombre , mitad Maymon. El es una entidad miksta echa de dos identidades diferentes: ‘El Djudaizmo’ ke le transmetyeron sus avuelos i ‘su dezeo de krear en si mizmo una mueva personalidad’ ke el se esforsa de realizar.
La absensya de real identidad: Komo lo vimos mas arriva, ‘el asimilado’ (el ke kere nyegar su orijen de nasimyento para adaptarse a la manera de bivir, pensar i djuzgar de un puevlo ajeno) es un individuo ke munchas vezas se syente echo intelektualmente i afektivamente de dos sivilizasyones diferentes i ke ansi bive debasho dos djeneros diferentes de dekretos i prinsipyos, lo ke aze de el un ser humano moralmente hibrido (a syertos momentos djudyo, a otros kristyano o muzulmano) un individuo ke tyene una konsepsyon de la vida difuza, diferente de la de sus ansestros i ke a syertas okazyones (sin esperansa de topar una repuesta) se demanda de si para si ‘lo ke realmente, el es’.
Kafka se syente el mizmo hybrido i esto lo aze sufriir. La kestyon ‘Ken so’ se topa en la kaji totalidad de sus ovras; en sus dos ultimos livros ke el no tuvo el tyempo de terminar ‘El Kastillo’ (le château)’ i ‘El Procheso’(le procès) los dos prinsipales personajes son nombrados ‘K’ i ‘Joseph K :’, lo ke (segun unos kuantos komentadores literaryos) indika una absensya en el de real identidad.
La kulpabilidad: ‘La sensasyon de kulpabilidad del djudyo ke no se syente ser un djudyo authentiko’ es munchas vezes doloroza, eya es komo un djenero de negasyon de si mizmo.
Konsernando su ovra posthuma mensyonada mas arriva ‘El Kastillo’, ovra polysemika ke se puede interpretar de varyas maneras, su amigo Max Brod propozo dos interpretasyones diferentes: La una de entre eyas es ‘el viyaje djudyo en tyerras hostiles’ , la segunda ‘La bushkida de una imposivle asimilasyon’.
El sujeto es simple: El individuo nombrado ‘K’ es kombidado a lavorar en el kastillo de un personaje novle yamado West-West . ‘K’ ignora lo ke es yamado a azer ; el pena a asimilarse a la populasyon del kazal ma no parvyene a integrarse realmente en eya i mizmo el es arrondjado por esta mizma populasyon.
Al pareser, en esta ovra, Kafka kijo deskrivir el periplo dolorozo del asimilado, el kual mizmo si se esforsa de integrarse kompletamente en un medyo ke no es el suyo, el keda syempre un ajeno.
I enfin, despues varyas hezitasyones i varyos kestyonamyentos de si para si, Franz Kafka empesa el enkaminamyento espiritual en direksyon del Djudaizmo, delkual vamos avlar en syete (7) dias.
