Eva Mozes Kor i su buchuka, Miriam, se engrandesieron en un chiko vilajio de Romania en el anyo 1940. Eyos eran la sola famiya judía en el vilajio. “Mi padre mos disho, de siempre rogar al Dio, i ansi el Dio mos va ayudar. ‘Los nazis no vana vinir aki por sesh Judios’ disho mi padre. Ma malorozamente, los nazis vinieron, i en un vagon yeno de djente, mos yevaron a Auschwitz.”
“Kuando arivimos al kampo, enduna mi madre, mi padre i mis ermanos disparesieron entre la djente. Trenta puntos duspues ke arivimos al kampo, mi buchuka Miriam i yo kedimos solas. Akeya noche ya entendi lo ke mos estava asperando. En basho aviya kadavras de tres ijos. Sus puerpos estavan arugados. Entendi ke la mizma koza puediya arivar a mi i a Miriam. Kaliya ke iziera una koza para pueder estar en vida.”
“La primera semana, mos ambezimos ke Dr. Josef Mengele izo matar a muestra famiya. A mi i a mi buchuka no mos keriya matar porke estava aziendo eksperimentos enriva de los buchukes.”
“Mengele empeso a echarmos enjeksiones tres vezes a la semana. Despues una enjeksion me ize muy hazina. Al diya, Mengele vino kon otros kuatro doktores, i disho, ‘Tiene solo dos semanas de vida.’
“Dos semanas, estuvi dezmayada. Me estava forsando a espertarme. No me iva murir. Me prometi de mi para mi de estar en vida, i ayudar a mi ermana. A la fin, reushi a sorbivir.” “Despues de mueve mezes de eksperimentos, los trupos rusos mos salvaron de Auschwitz.”
“Mezmo ke agora estava libra, me estava sintiendo ke esto es un tipo diferente de prizion, estava en la prizion de amargura i de no pueder pardonar.”
“Si me demandavan si estava aravyada kon el Dio, estava aravyada kon todos, kon el Dio, i kon el mundo entero.” Eva estuvo en su prizion asta el sukuenten anyo de la liberasion de Auschwitz. Kuando vijito el kampo de konsantrasion, Eva pardono a todos.
“Akel diya, ke estuve en las ruinas de la kamara de gaz, me akodri de todas las personas ke deviya de pardonar. Pardoni los nazis. Pardoni Mengele. Pardoni las personas ke izieron los eksperimentos. Pardoni a todos, porke keriya amostrar mezmo a mi, ke tengo el pueder de pardonar. En pardonando, me sinti una libertad emosional. Esto lo ize para mi. Agora estava libre. Mas no iva pensar ken me izo esto, deke me izo esto. Me sentí ke toda la dolor ke estava yevando en mis ombros disparisieron. Mas no era una prizoniera de mi pasado trajiko.”
Oy, Eva es la dirijente (idareci) de su propio muzeo del Holokosto en Terre Haute, Indiana. Eva avio este muzeo en la memoria de su ermana Miriam, ke murio de kanser kuando teniya 90 anyos. Aya, eya esta kontando sus ekperiensias en Auschwitz, i las lesones ke se ambezo asta ke pardono a todos. “El Dio mos dio el pueder de pardonar, el pueder de pardonarmos, i de pueder pardonar a las otras personas.”
Su mesaje es semplo - pardonar-mezmo a los mas negros enimigos.
Mas MMMas de 1.500 de buchukes fueron utilizados por los testes de Mengele, i la majorita de eyos murieron. La armada sovietika libero el kampo en el 27 de enero del anyo 1945. 180 kreaturas kedaron en vida, la majoría eran buchukes de Mengele. Los embiyaron a un orphilinato en Katowice, Polonia.
Una amiga de la madre de Eva tomo la responsabilitad de Eva i Miriam, i duspues de la liberasion, las embiyo a Romania. Despues de la gerra, Eva i Miriam bivieron en Romania, kon su tia Irena (tambien un sorbiviente). Aya se fueron a la eskola, i bivieron debasho del rejim komunisto. En el anyo 1950, kuando tenian16 anyos, resivieron el permito para salir de Romanía, i emigrar a Israel. Se enstalaron en Haifa. En el anyo1960, Eva se kazo kon Michael Kors, tambien un sorbiviente del Holokosto, i se enstalaron en los Estados Unidos. Tuvieron dos kreaturas, Alex i Rina.
En el anyo 1984, Eva fondo VELAS, (İjos de Auschwitz nazis eksperimentos de laboratorio mortal de los sorbivientes). Eva kontinuo a ser aktiva, dando konferensias sovre el Holokosto, i organizando tures a Auschwitz. En el anyo 2007, Eva lavoro kon los avokatos del estado de Indiana, Clyde Kersey i Tim Skinner, para pueder pasar una ley, i meter la edukasion del Holokosto en las eskolas sekondarias. En el anyo 2015, aparejo un dokumanter en el CNN, ‘Bozes de Auschwitz.’ En el anyo 2015, se fue a Almania para partisipar en el juri del nazi Oskar Groening. Aya, Eva pardono Groening, i lo felisito por akseptar a asistir a este testimonio.
En el 23 de enero del anyo 2016, Eva partisipo a un dokumanter aparejado en la Angletera,”la ijika ke pardono a los nazis”.
En marzo del anyo 2016, Eva se va ir a Los Anjeles, ande los dalkavo 12 sorbivientes del Holokosto vana asistir a un Projekto Testimonio. Eva Kor, fin agora, resivio munchos premios por sus lavoros sovre la edukasion del Holokosto.
