El 7.02.2016 dia de alhad selebrimos kon grande entuzyasmo el treser dia internasyonal del Ladino en el salon de Neve Shalom kon una djentorya mas de 300 personas.
Selebrar este dia se izo una tradisyon para mozotros los ke avlan i eskriven en djudeo-espanyol, los pratikantes de esta lingua presyoza de nos avuelos; ke no vamos a deshar murirla i vamos a azer todo lo ke puedemos para azer bivirla anyos largos…
Kuando mos telefono Silvyo Ovadya para azer una reunyon por avlar este dia emportante, kualo puedemos azer para englenear a todos un dia entero, mos fuimos kon grande plazer para dar muestras ideas.
El dia preparado por los avladores i avladoras (konuşmacı) i spesyalamente kon la ayuda i lavoro grande de Karen Şarhon kon Emel Benbasat; empeso kon la kantika simpatika ‘Las Sardelas’ ke munchos partisiparon.
Despues de la prezantasyon de Karen i Silvyo me yamaron en dizyendo el sujeto ke va avlar.
İze una prezantasyon sovre ‘Yitzhak Navon’ ke fue el sinken presidente del pais; el deputado, ministro, eskrivano del teatro muzikal famozo, ‘Bostan Sefardi’, el intermedyaryo (aracı) entre los paises arabos, Israel i palestinyanos.
Era konosido kon su apoyo a la ‘PAS’. Desho una trasa emportante en el kampo politiko, akademiko i kultural.
El era un ‘Ombre Del Puevlo’.
Yitzhak Navon fue el kreador i el primer presidente de la ‘Autoridad Nasyonala del Ladino i su Kultura’ en 1997.
En su prezantasyon los ‘Rekuerdos de mi Chikes’, Soli Avigdor mos konto kon un langaje ingenioso (nükteli) los rekuerdos del tyempo ke se iva a la mestra (yuva) i la kondukta (davranış) de los profesores.
‘Una Vida yena de Teatros’ prezentada por Forti Barokas fue una distraksyon para la asistensya ke se akodraron de los teatros djugados en el ‘Dostluk’.
Despues, Anna Eskenazi, Suzet Herman i Karen Şarhon prezentaron un skeç ‘Ketana por Sehora’ en kontando lo ke les paso por la kavesa kon una lingua ironika para azer riyir los partisipantes.
Dr. Eliezer Papo dyo una konferensya sovre ‘La Tradisyon de las Superstisyones de los Djudyos Sefarades’.
Carolina Spiegel, profesora en la universitad de Bremen ke izo su tez de doctora sovre la lingua djudeo-espanyol avlo; sovre los roportajes ke izo fina oy kon demandas enteresantes por esta lingua.
El Konsul Jeneral de la Espanya Pablo Benavides avlo sovre la nasyonalidad Espanyola, ke para pueder realizar este fakto tuvo ayuda del Grande Rabino Rav İsak Haleva kon el presidente de muestra komunitad İshak İbrahimzadeh, los remersyo kon amistad.
Aviya un program bastante kargado. El direktor de Cervantes, Pablo Assuero, dyo detalyos por los egzamenes ke se deve de pasar para pueder tomar la nasyonalidad Espanyola.
El Grande Rabino Rav İsak Haleva; felisito a todos los ke estan dando apoyo para azer bivir esta lingua, i la kontentes ke tyene.
Dora Niyego, una de las kuatro eskrivanas del djudeo-espanyol del jurnal ŞALOM; mos izo riyir kon las anekdotas refletando la kultura djudia i las partikularitades propyos a los djudios.
La sorpreza fue a la fin kon el skeç de Jojo Eskenazi, Fani Bonofiel i Solita Algazi ke metyeron a la shena el djugo: ‘La Vida Djudia de ayer i oy en la famiya de Moiz’. Fue una lokura, un djugo maraviyozo de los tres a pishar de la riza. Veramente Moiz i Kleret nasyeron por la shena, un kuple ekstraordinaryo ke se dan a entender kon los ojos i sejas.
Es akel momento ke responden a lo ke va avlar el den frente, ya son aparejados a dar repuestas sin prepararsen. Esto es un dono de grande valor.
Felisitasyones es un byervo insufizyente (yetersiz) para eyos. Dyo ke no les tome esta pasyon, esta ardor de djugar teatros para las nesesitades de la komunitad.
“Bravo, Bravo, Bravo…”
Antes de terminar, kero felisitar de aryento del korason a los kreadores de este dia kon la grande organizasyon; Silvyo Ovadya i Karen Şarhon por el entuzyasmo, la reushitad i la kontentes de todos.
El Dyo ke mos ayege al anyo vinidero kon sanedad i kon mas muncha djente inşallah…
