Martin Buber fue un testigo muy sensivle de los enventos trajikos ke (durante la primera mitad del venten siglo) se abatyeron sovre sus korelijyonaryos en nombrozos payizes de la Evropa. El bivyo, si no fizikamente ma emosyonalmente, la evolusyon dramatika de las varyas trajedias del puevlo djudyol al Este komo al Oeste del kontinente i esto lo pusho a ser muy aktivo en la bushkida de una solusyon no solo a los grandes problemas materyales ma tambyen espirituales a los kualos eyos eran konfrontados.
Atado desde el anyo 1898 al Sionizmo, del kual el fue uno de los grandes partisipantes, el insistyo sovre una Aliah de los djudyos en Palestina, ma a la diferensya del Sionizmo de Theodor Herzl ke era politiko, el de Martin Buber era kultural.
Esta aspirasyon se manifesto kon su partisipasyon aktiva a los varyos kongresos sionistos i partikularmente al del anyo 1922 ande Buber propozo de estableser un dialogo pozitivo kon los muzulmanos Palestinyanos.
Durante la primera gerra mundyal, el partisipo a la kreasyon de una komisyon nasyonal djudia afin de mijorear las kondisyones de vida de los djudyos del Este.
En 1921 el izo la konosensya del fllozofo i theologo Franz Rosensweig kon el kual (asta la muerte del dicho intelektual) traduzyo la Biblia Hebraika en Alman.
Un muevo humanizmo paresia aver espuntado, un humanizmo djudyo, espiritual i avyerto no solo a sus korelijyonaryos ma a su entorno en totalidad.
Konvensido de la valor sosyal del djudaizmo i partikularmente del sentimyento de fraternidad entre las varyas komunidades djudias, Buber konkretizo sus aspirasyones humanitaryas en munchas de sus ovras literaryas.
Desde su deskuvyerta de la Haskala (Las Luzes Djudias del dyesiochen siglo) Buber se lntereso al Hasidizmo, movimyento mistiko ke tuvo una influensa muy fuerte sovre el, i es ansi ke en meldando i rekojendo los kuentos hasidim, el metyo en evidensya su propya relijyozidad, lo ke renforso la de munchos otros de sus kontemporeanos djudyos.
Igualmente es de su refleksyon sovre el Mistisizmo Hasidik, ke nasyo en lo mas profundo de su propyo esprito “la idea de un dialogo kaji permanente entre el Ombre i Dyo” ansi ke muncho mas raramente entre el ombre i el mundo, el kual envezes devyene un simple dialogo entre “yo i esto” tal ke fue ekspozado en su ovra “Yo i Tu”, livro publikado en el anyo 1923..
Martin Buber fue antes de todo un ombre ke bushko el dialogo en la absoluta sinseridad de su Yo, un ombre no solo konsernado por si mizmo ma igualmente ‘por el otro kon sus propyas partikularidades’.
Komo lo meldi durante mis investigasyones, Buber parte del prinsipyo ke el ‘ser humano’ es antes de todo un individuo inkapavle de realizarse enteramente sin komunikar kon los otros i partikularmente kon el Kreador del mundo. Ansi el ‘Ser humano Buberyano’ puede igualmente ser definido komo ‘Homo religiosus’ por la simple razon ke el amor por la humanidad konduze al amor por su Kreador.
La ‘Encyclopedia Judaica’ mos dize “The starting point of Buber’s philosophy is not man in himself, not the world in itself, but rather the relation betwen man and God” (el punto de partensya de la filozofia de Buber no es el Ombre en el mizmo, ni el Mundo en si mizmo, ma la relasyon entre el Ombre i Dyos.”
Al pareser, segun Buber “la palavra del ke dezea avlar kon el Humano sin avlar kon Dyos no se kumple”, ni de mezmo se realiza “la palavra del ke dezea avlar kon Dyos sin avlar kon el ombre”.
De su parte el selebre komentador Dominique Bourel mos dize ke es sovre todo kon su teoria “Yo i tu” ke la filozofia de Martin Buber se espandyo internasyonalmente. En efekto la mas parte de los theolojyanos almanes de akeya epoka, protestantes i katolikos, diskutyeron kon el a este sujeto.
A la sigida de su reputasyon de mas a mas ancha, Martin Buber empeso a ensenyar en la Universidad de Francfort, posto del kual el demisyono en 1933 despues la venida de Hitler al poder. Entonses el kreo ‘un organizmo sentral de edukasyon adulta djudia’ ke obtuvo un grande sukseso de parte de sus korelijyonaryos.
El salyo de Almanya en 1938 para instalarse en Yerushalayim, ande ensenyo la sosyolojia en la Universidad Hebrea. İ en 1942 devino myembro del partido Yehud ke tenia komo objektivo prinsipal de ayegar a mijores relasyones entre djudyos i arabos.
Martin Buber fue syempre partizano de un esforso ininterumpido afin de mentener una situasyon de paz kon sus vizinos; su profundo humanizmo no fue nunka unikamente tornado en direksyon de sus ermanos de Fey, ma tambyen en direksyon de kualkyer humano.
En el anyo 1951, Martin Buber resivyo el famozo Premyo Goethe en la Universidad de Hamburg.
El muryo en 1965 syempre la facha tornada en direksyon de la paz i de un esforso de entendimyento resiproko kon el otro ke si mizmo.
