İ de muevo el terrorizmo golpeo la Turkia; ke sea la semana pasada en Ankara, kapitala del payis, o en Istanbul megapola fabuloza, el enemigo ken ke sea se esforsa vizivlemente de destruir por syempre los lugares ke son los puntos los mas importantes de muestro payis:
Ankara, kon la importansa de su sentro governomental i las varyas embasadas estranjeras ke aseguran su kontakto kon varyos payizes jeografikamente vezinos o leshanos.
İstanbul, de una ermozura natural indestruktivle, sus kuatro izlas a proksimidad i su Bosforus ke desparte la sivdad sovre dos kontinentes el uno Evropeo el otro asiatiko, dos sivilizasyones diferentes ke munchas vezes se mesklan la una a la otra i azen ansi un puevlo ke (aun profundamente Relijyozo i Fidel a los preseptos de su Fey ansi ke a la rikeza de su Historya) es tambyen avyerto a todo lo ke aze la glorya de la sivilizasyon aktual, progresso medikal, amor por la syensya ansi ke por el arte i la literatura.
Esto dicho, so segura ke todos los prezumidos lektores ke tendran la voluntad de meldar el prezente artikolo, ya son sin dubyo informados de todo lo ke se paso Shabat demanyana; la prensa eskrita komo la elektronika no mankaron (komo syempre) de komunikarmos los mas chikos detalyos del kavzo… Entonses, deke eskrivirlos de muevo? deke ovligar el lektor a meldarlos una ves mas? La razon es ke no se puede deshar en el silensyo semejantes faktos, ninguno deve kedar kayado porke otros tuvyeron la oportunidad de avlar o eskrivir antes de el. No avlar de un tal akontesimyento ekivale munchas vezes a un akto de indiferensya.
Una koza repetada no es syempre la konsekuensa de un dezeo de inchir el espasyo vazio de una pajina, ma una mueva palavra de protestasyon o de akavido.
Si…esta vez (al pareser) el enemigo se esforsa de destruir los puntos vitales del pays, entre los kualos prinsipalmente: “la manseves estudyante” komo lo vimos en Ankara i “la ekonomia del payis” en esforsandose de destruir el turizmo, tal ke fuimos los testigos en las dos ultimas desgrasyas ke se produzyeron en Istambol: la de ‘Sultan Ahmet’ baryo situado en la Turkia Historika, i la de İstiklal caddesi sityo ke se topa en la partida oksidentalizada de la sivdad.
Kuatro personas toparon la muerte en el golpe kriminal de Shabat: un İranyano i tres İsraelyanos nombrados Yonatan Suher, Simha Dimri i Avraham Goldman, ansi ke nombrozos otros ke fueron feridos gravemente.
La implakavle fatalidad, syempre syega i indjusta, kijo ke la muerte i la sufriensa metan fin a la egzistensya de kuatro personas ke tenian el derecho de ainda bivir, ainda ver i ainda lavorar.
El dia mizmo, Shabat verso la tadre, unas kuantas horas despues el horrivle akontesimyento, Israel mando dos aeroplanes para rekuperar los tres Muertos, ansi ke los feridos ke puedian ser transportados sin reziko de agravasyon.
Facha a facha kon las kontinuales violensas a las kualas mos topamos enfrentados, una kestyon vyene inevitavlemente al tino: “Es ke la muerte de los tres israelyanos i las feridas de los onze otros” son el rezultado de una koinsidensya? o byen de un akto voluntaryo perpetrado konsyentement en sus direksyon?
El Primer Ministro Israelyano Benyamin Natanyahu afirmo ke no egziste ninguna prova ke el atentado de Shabat demanyana en Estanbul tenia komo objetivo la muerte de turistos Israelyanos, i esto mizmo si tres de entre las kuatro personas ke muryeron eran sitizanos israelyanos.
Segun lo ke dize la prensa Turka del grupo Doğan, este ultimo atako terroristo fue perpetrado por el afamado muevo Kalifato İşid/Daeş al kual kaji ningun grande Estado Muzulmano no izo asta oy alejensya. El ADN del kriminal ke lo realizo korresponde al de un sivdadino Turko el kual personalmente era atado al dicho sentro terroristo.
Oy “lunes el 21 del mes de Marso” es el primer dia de primavera i solo dos dias mankan para la fyesta de Purim… Ke de agora adelantre el mundo rekonoska la valor inkonmensuravle de ‘la paz’ i de ‘la amistad’, prinsipales vektores de un muevo humanizmo ande kada kriansa sera avyerta a la solidaridad mutual kon ‘el otro ke si mizmo’ kual sea su orijen.
