Un Mesaje de Yaves Tradusido por Shimon Geron / Sydney
El Jewish News de esta semana tenia el artikolo presentado por el Rabino Yaakov Glasman, titulado “MESAJE DE YAVES”, ke es el mesaje sentral de Purim.
Ay una istoria de muncha fuersa:.”A un Rabino lo despiertan a las 03.00 de la madrugada i entra ayi una pareja en disputa. Kuando el Rabino les demanda si era una kestion de urjensia, eyos responden en diziendo: “Amanyana el rezin nasido va tener su Berit Mila. El Rabino les dise: “Entonses va ser un momento de alegria. SIMAN TOV. Porke estash perturbados tanto?” La repuesta era: “Porke no estamos de akordo kon el nombre ke va resivir el rezin nasido.”
La mujer dize: “Kero yamarlo MOSHE, ke era el nombre de mi avuelo.” El marido dize: “Kero yamarlo MOSHE tambien, ke era el nombre de mi avuelo.” El Rabino perpleksado les dize: “Si los dos keresh dar el nombre de MOSHE, ke es el problem?” Esta vez la mujer dize: “No, Senyor Haham, tu no me entiendes. Mi avuelo era un eskolar grande, un ombre muy respektado ke partio del mundo kon un nombre bueno. El avuelo de mi marido era un Sharlatan, partiendo al otro lado kon un nombre malo. Dezeo yamar a mi ijo sovre mi avuelo i no sovre el avuelo de mi marido”. El Rabino se araska la barba i demanda de partir por unos kuantos minutos para pensar. Entra en la kamareta de su estudio i se mete a meditar. Despues sale afuera diziendo: “Tengo la solusion perfekta. Amanyana en el Brit Mila, se va dar el nombre MOSHE i vamos a ver ke sera de el un dia. Tenemos ke asperar ke se engrandeska. La repuesta sera topada en la manera ke se va elevar este ijo.”
Ke tiene ke azer esto kon Purim? Purim sinyifika munchas kozas. Unos lo ven komo el Orgulio Judio i otros lo ven komo un Festival Feminino por la Megila de Ester. Unos lo ven komo una Fiesta Misterioza, porke el Dio eskondio la kara de su Puevlo i otros lo ven komo un Milagro ke se produsio en Persia. Lo mas de esto es la okazion ke las kriaturas se metan sus vestidos buenos para gozar de la Fiesta. Purim kontiene munchos mesajes. Ma una koza es bien kritika, entra en djugo en la Juderia Kontemporanea. Una koza ke deve ser ensenyado i reinforsado en kada pulpito i eskola. Esto es La Edukasion Judia. Sovrebivimos kontra la kalamidad de HAMAN basho el Reynado de Ahashverosh i en 127 paises, por sola una razon: “LAS KRIATURAS JUDIAS”.
MORDEHAY asemblo a 22,000 kriaturas Judias i las eduko kon la Tora i rogo al Dio por Su mersed. Les dio el sentido de sakrifisio para deklarar la Fe Judia. “En vida i en la muerte no partiremos de Mordehay.” Ansi esto mos dio la fuersa de no piedrer la esperansa delantre el mas grande Anti Semitismo. No era el vestido, el Tanit de Lamento, o las lagrimas i los gritos de SHUSHAN ke trusheron la mersed del Dio. Eran las kriaturas Judias,puras en sus pensamientos. Kuando muestras kriaturas internalizan las valores de sus erensia i forman un lien en la kadena ke se va atras a Abraham, mozotros komo un puevlo seremos mas seguros i muestra egzistensia sera mas garantizada. Para resivir estas valores ay ke demandarlas antes. Deven ser kompartidas. Ken es ke puede azerlo mejor? Son los parientes. A eyos les kaye esta responsabilidad. La eskola solamente no abasta. Las valores ke resivieron las kriaturas eran valores ke se bivian. Era la intension de Mordehay. Ay una diferensia entre lo ke se dize i lo ke se aze.
Suetamos mas alegres Fiestas de Purim...
Kreaturas Judias puras en sus pensamientos!
