Estamos biviendo los diyas final del invyerno. Oy, afuera ay un tyempo maraviyozo, ralo en el 8 del Marso. Ma, esto no es muestro sujeto de oy. No me akodro aver remarkado asta oy, (o muy probavle) ke los arvoles se espertan tan demprano de sus esfuenyo de invyerno. Ma esto es lo ke vide kuando avri la ventana. Los ramos ya ampesaron a enfloreser . No abasta esto, un papiyon bolando de aki, de aya, vino se pozo al bodre de mi ventana…
No me pude impedir de pensar: esto es el mirakolo de la Natura, la Primavera, la alegriya de la Natura. No pudiendo impedirme de partisisipar a esta alegriya, desidi de eskrivir este teksto. Dizen ke la Umor ez kontajyoza, seya la buena, seya la negra. No asperaremos solamente de la djente o los evenimientos para sintirmos de buena umor.
Amanyana, mos pudemos espertar kon un sielo oskuro, ennuvlado i mizmo kon luvya. Esto no deve ser una razon de azer mutra. A la kontra, kon optimizmo puedemos pensar ansi: esta luvya ve ser provechoza para la tyerra i los arvoles i todo modo de sembrado, en kurto para la Natura. Naturalmente, muestra buena umor no va azer despareser las nuves grizas ma, a lo menos mos va illuminar muestro diya. En una manera, es komo djugar a “Pollyanna”!..
Ansi se deskuvre las chikas, las inosentes alegriyas ke mos da la vida. Muy klaro ke kale kerer i saver verlas. Todos tenemos difikultades, problemas chikos o importantes. De una manera devemos bushkar a topar solusyones, bushkar a venserlos.
Antes unos, kuantos anyos aviya konosido una dama muncho mas aedada de mi. Era komo filozofa. Oy en diya me akodro los konsejos ke me dava. Uno de estos, si no me yerro era sovre la umor. Me aviya konsejado de ser un poko egoista de vez en kuando: Si no te estas sintyendo de buena umor” me aviya dicho “evita de frekuentar las personas tristes, syempre keshozas de todo.A lo menos por el tyempo ke no te vas a sintir tu mezmo optimista,de buena umor”.
Puede ser ke era un bon konsejo ma, kontraryo a mi karakter. Enfin, metyendo el punto final un konsejo de mi parte: Profitad de la mueva sezon, del renasimiento de la Natura ke otomatikamente inspira optimismo. No solo vash a ser alegres, ma tambien un manadero de buena umor para vuestro derredor….
