“Muy keridos korelijionarios,
Este anyo fiestamos el “Pesah” cuntos kon el Şabat komo una koensidensia buena i nuestra alegriya esta redoblada.
En el Seder de Pesah vamos a resitar la Agada kon nuestras famiyas, serkanos i kon nuestros korelijionarios todo en eksperimentando konsensiozamente sovre propio nuestras almas la salvasyon del kativeryo de edjipto de nuestros abuelos i vamos prezentar nuestros rengrasiamentos al El Todo poderozo ke nos ayego a estos diyas.
“Baruh Şeehiyanu Vekiyemanu Veigiyanu Lazeman Aze”
Komo ya lo savesh bien Pesah komo ‘hag Aaviv/Fiesta de la Primavera’ nos apregona el enasimiento de la natura. Esto es una nueva fuersa, nueva enerdjia i una nueva animasion. Esto es el tener buenas esperansas verso el avenir, i estar siguros por el futuro.
Esto es tanbien la fuersa de superar sovre todas las enkonvenensias de lo pasado. Espero ke no mankaresh de valorizar el Pesah i por su esta parte.
Keridos ermanos.
Pesah tanbien nos kondukta de edukar nuestras nuevas djenerasiones verso nuestra fe i nuestra kultura. No ay dubyo ke el manadero esansial de esta edukasion es la famiya.
En todo esto no kale enyagar el rolo de nuestra eskola i nuestras asosiasiones i sovre todo el rolo de Talmud Tora. Espero ke no mankaresh de estemualar vuestros ijos i ijas a estas institutiones.
Muy keridos ermanos.
Komo ya los savesh; disde el “Pesah” pasado asta oy alkansimos a siertas etapas bien emportantes. Vos puedo rekordar la reapertura de la Grande Sinagoga de Edirne, Fiestar el
Hanuka en Ortaköy, la Reaperturade nuestro Museo en Neve Şalom, la ekspozision de Çanakkale en Ankara i otras mas.
No ay duda ke todos estos fueron los frutos de los lavoros infatigables de nuestros diridjentes ke versieron sus tiempos i sus enerdjias kon abnegasion donde los rengrasio i los agradesko una otra vez. Meresen vuestro apoyo en todo modo de senso.
Esto siguro ke ya tenemos munchas razones de tener buenas esperansas Verso nuestro futuro.
Siendo yeno de estos pensamientos i sentimientos vos suheto un buen
Pesah kon vuestras famiyas i todos vuestros serkanos todo en bendizyendovos kon todas las bendisyones de nuestra Santa Tora.
Hag Pesah Sameah.”
Rav İsak HALEVA
Gran Rabino
