Martes el 20 Avril 2016;
Refael Torel
fue rendido a la tyerra despues de una larga vida anchamente dedikada a la karidad i al kudyo del otro ke si, ken ke fuera, serkano komo tambyen leshano.
Durante su larga prezensya sovre tyerra, el metyo en aksyon las ermozas palavras de Rabbi Israel Salanter ke avia dicho: “Los menesteres materyales de mi proksimo son menesteres espirituales para mi”.
Rafael Torel (nasido Fresko) desha detras de el ‘una ovra inmensa de piadad, klemensya i solidaridad humana.
Guerfano de padre desde su chikes, el fue engrandesido en kondisyones ekonomikas muy prekaryas por una madre yena de solisitud, la kuala provablemente le inkulko desde su ninyes la valor del esforso personal ke solo permete al individuo un real realsamyente en la vida. Ansi, al empesijo de su karyera komersyal, syempre sostenido por la afeksyon maternal, ma realmente grasyas a su propyo lavoro ansi ke a su poder de refleksyon, el supo alkansar a una situasyon sosyo-ekonomika ke progresivamente se ancheo de dia en dia mas asta azer de el uno de los ombres no solo los mas poderozos ma igualmente los mas apresyados de muestra kolektividad.
En las primeras desenias despues la fin de la sanginarya Segunda Gerra Mundyal, uvo en los payizes evropeos i tambyen en las esferas terrestas vezinas, un largo periodo de amargura ke paradoksalmente provoko intensos esforsos de realsamyento, i es en esta atmosfera de insertidumbre mesklada de esperansa ke Rafael Torel, grasyas a su fuerte persepsyon de la situasyon, fraguo su futuro.
Muy atado a la Komunidad en lakuala el nasyo, el voluntaryamente partisipo a su desvelopamyento. El no fue simplemente un grande filantropo ma tambyen paralelmente un grande reformador.
Komo lo meldi en el ermozo livro entitolado “Or-Ahaim Hastanesi “ : Kuando en el anyo 1962, Israel Menase (entonses prezidente del Konsilyo Laiko de muestra komunidad ) akompanyado de Mithat Kaldam (presedente prezidente del Orahaim) insistyeron para ke Rafael Torel asume la prezidensya de esta ovra , el aksepto despues una chika hezitasyon provokada por el espanto de neglijar su propya responsabilidad komersyal en haveransa kon Leon Benozilyo, el kual (el mizmo grande filantropo) le prometyo immedyatamente de remplasarlo en todas sirkunstansyas.
Era una epoka ande el Hospital se topava en un estado lamentavle, la sala de operasyon mankava de hijyen absoluta, lo ke realmente era un reziko de muerte para los operados .
De otra parte, la grande fragua sentral ansi ke varyos paviyones ke se topavan a su lado tenian los mahsenes yenos de agua i un guezmo a syertos momentos insuportavle rendia la atmosfera difisilmente respiravle.
Immedyatamente despues su nominasyon, debasho el kontrol del arkitekto “Refael Alguadish” i del doktor “Jak Eskenazi”, Refael Torel izo venir ovreros ansi ke materyal de konstruksyon de su propya fabrika afin de mijorear la situasyon i azer del hospital Or-Ahaim un sentro de salvasyon i no de peligro:
De mezmo poko a poko los vyejos aparatos de kontrol ke eran inegzaktos fueron remplasados por muevos i la mueva meza de operasyon ke la “Derby Lastik Fabrikasi” avia ofresido fue instalada .
Oy grasyas a los esforsos de Rafael Torel i de unas kuantas otras personas de grande valor, dirijentes komo donatores, la komunidad djudia de Estambol se puede engloreser de posedar un sentro medikal de primera kualidad.
En desparte del hospital Or-Ahaim, Refael Torel tuvo a su aktivo munchos otros aktos karitativos , partikularmente en lo ke konserna el ermozo desvelopamyento de la Matan Baseter i del Barin Yurt, dos ovras importantes ke se desveloparon grasyas a sus donasyones i de mezmo grasyas a sus konsejos.
En el anyo 1978, desde los primeros mezes del renovelamyento de la vyeja Matan Baseter , el komite de la mueva ovra tomo la desizyon de distribuir kada mez (en djunto kon una mezada mensual) sakos de komanya a los ke se topavan en el menester, i esto kontinua syempre.
Durante su vida, Rafael Torel kijo partisipar anchamente i mando regolarmente desde los anyos 1978/79 asta su muerte, montantes de moneda muy konsistyentes ke permetyeron la distribusyon de nombrozos paketos kompuestos de 17 o 18 produktos, tal entre otros: kezo blanko, kezo kasher, azeyte, margarina o manteka, leche, guevos, aroz, lentejas , karne , poyo ets…..ets….
Los dias pasando, la Matan Baseter sintyo imperativamente el menester de krear un muevo avrigo ke puedra resivir desmazalados de kualkyer edad, inkapavles de lavorar para subvenir a sus propyos menesteres vitales.
En esta sirkunstansya tambyen Rafael Torel ayudo muncho grasyas a su partisipasyon personal komo tambyen a sus konsejos muy judisyozos i prinsipalmente grasyas a la ermoza konstruksyon ke el izo fraguar serka de la guerta del Barınyurt, kon un montante de moneda ke le avia deshado la sinyora Kohen, al kual montante el personalmente adjunto el resto ke era nesesaryo.
Ke su alma repoze en paz i kel rekuerdo de su humanizmo kede syempre bivo en la memorya de todos muestros korelijyonaryos.
Muestras kondolensas las mas sinseras a su ija, su ijo i a todos sus proksimos de los kualos partajamos la dolor.
La Alegria de la Fiesta de Pesah
