Ay de esto unos kuantos dias, meldi la refleksyon ke un autor enteramente deskonosido avia eskrito antes puede ser munchos anyos: “La orasyon es la mas dulse konsolasyon del desmazalado”
Devo konfesar ke al empesijo kedi un poko septika, ke rekonforto puede prokurar la orasyon (en uno de estos golpes mortales ke kada tadre mos son anunsyados por los gazeteros de la televizyon) a un padre i una madre ke pyedreron uno de sus ijos? O byen a la mujer deskonsolada “ke vido su marido (solo verdadero apoyo moral i fiziko) serrar por syempre sus ojos a un mundo krual ande todo es tinyevlas i sufriensa.
Eske unos kuantos dias o semanas despues del drama, en un ambiente muevo mas o menos indiferente ande eyos se puedran topar, el solo fakto de orasyonar los va arrankar a sus soledad?
A esta okazyon me akodro (sin ninguna relasyon kon los aktos terroristos de los kualos vengo de avlar) las palavras ke vos seran sitadas en uno de los paragrafos sigyentes, de uno de muestros ansyanos amigos, ombre de muy ancha kultura, grande intelektual kon el kual mos era (mi marido i yo) muy plazyente de diskutir i al kual personalmente devo una grande parte de lo poko ke konosko sovre varyos sujetos.
Su mujer “Elfi Mayer” ke era una grande muzikologa de orijen otrishyana organizava kada kinze dias seansas de muzika klasika enrijistrada, a las kualas eramos nombrozos a asistir i a la sigida de las kualas diskutavamos sovre diferentes sujetos artistikos komo tambyen filozofikos…
Todo en syendo muy konsernado por el djudaizmo i partikolarmente por la kreasyon del Estado Israelyano, muestro amigo George Mayer no iva kaji nunka a la sinagoga para orasyonar i mizmo despues la desgrasya de la Shoah, el devino kaji atheisto.
Anyos pasaron i un dia, Elie i yo vimos muestros amigos muy desganados. A una epoka ande los kudyos medikales sovre el kanser no eran muy performantes, Elfi tenia una tumor en la pechadura.
Es evidente ke a la sigida de esta triste novedad, el programa de las reunyones muzikales troko kaji enteramente, Elfi i George ivan kon grande frekuensa a Vyena ande eya resivia los kudyos los mas intensivos de akel tyempo, ma los medikos a ningun momento fueron muy optimistos i todos sentiamos ke moralmente George se topava en un estado de terrivle depresyon, ma un dia (me akodro komo si era ayer) el me disho “Vous savez klara, hier j’ai prié, moi qui suis un athée j’ai senti le besoin de prier”. La ekspresyon de su kara era syempre muy triste ma muncho mas serena, komo si un djenero de shehina avia abashado en el.
Despues la muerte de su mujer, yo nunka tuve la ozadia de demandarle si syempre el era un atheisto.
I oy, aproksimativamente 40 o 45 anyos despues este triste epizodyo, revistas medikales eskriven ke una invistigasyon echa en Harvard mostra ke el fakto de orasyonar aumenta no solo la serenidad de la persona ke lo praktika sinseramente, ma de mezmo “aze pujar su esperansa de vida” i diminua los riskos no solo de atakes kardyakos ma tambyen de kanser.
Por seguro, keridos lektores, ke kaji todos ya savemos ke nombrozos faktores, tal ‘una alimentasyon sana, agzersizyos fizikos adekuados, komo tambyen bivir en un espasyo byen aerado i por seguro ser moralmente en estado de paz kon si mizmo’ son elementos de lucha muy pozitivos. Agora se adjunta a eyos la orasyon, estos momentos ande la persona tyene kaji la konviksyon de toparse delantre una entidad espiritual superyor.
A notar ke “el Dr Tyler J Manderville de la Universidad Harvard“ afirma ke segun los rezultados ke el i sus kolavoradores obtuvyeron a la sigida de esta investigasyon ke turo kaji 16 anyos, sovre 740.000 personas aedadas entre 30 i 55 anyos: 13.573 pasyentes muryeron entre los kualos 2721 de una kriza kardyak i 4479 de kanser.
Este analizis revelo partikularmente ke ‘los ke partisipavan mas de una ves a la semana a orasyones komunes en varyos sentros relijyozos’ tuvyeron un shifro de mortaldad de 33% inferyor a los ke nunka se rendyeron en kualkyer sentro relijyozo.
Segun lo ke pensan varyos syentifikos: las seremonias relijyozas dando a los partisipantes “esperansa i konfiensa en sus fey”, sus nivel de optimizmo puja i kontribue ansi a reduzir sus depresyon moral, lakuala es por seguro un faktor de agravasyon.
A kada uno de refleshir i organizar su vida.
