Myerkoles la noche a las horas onze manko un kuarto, sono mi telefono…ken puedia ser en esta tadria de la noche? el ekran de mi chiko ‘portavle’ indikava ke la yamade venia del estranjero ande tengo todos los miyos: İjo, ijas, inyetos i bis- inyetos, dispersados en Fransya, Estados Unidos i Israel… Ke avia afitado en uno de estos tres payizes? En el reseptor la boz de mi ijo David: “Klara, No se si ya konoses la triste novedad, penso ke ‘no’ i te kero dezir ke ya parveni a avlar kon “Benjamin” i “Misha” (sus dos ijos aktualmente sitizanos İsraelyanos), ningun de entre los dos se topava en el lugar del muevo asalto terroristo”.
Esto no me impedyo de sentir en mi una inmensa tristeza, de muevo la violensa i el dolyo en Tel-Aviv… de muevo padres i madres amargados… de muevo este terrivle sentimyento de inkyetud por el mas chiko retardo de una ija o de un ijo ke manka de entrar a kaza a la ora habitual i del kual el telefono no responde.
Si… komo todos ya lo oyimos o lo meldimos, Myerkoles la noche dos terroristos arabos ke pudyeron klandestinamente entrar en el mas grande komplekso komersyal del payis, avyeron huego sovre klientes de uno de los afamados kafe-restorantes del Marketo de Sarona, azyendo ansi kuatro viktimas arrankadas por syempre a la vida i unos kuantos ferridos entre los kualos syertos nesesitavan una hospitalizasyon inmedyata.
Segun lo ke meldi, los ke por syempre serraron sus ojos a un mundo indjusto i salvaje, son:
- İdo Ben Ari, aedado de 42 anyos, padre de dos ijos.
- İlana Neve, aedada de 39 anyos ke desha en la dolor 4 ijas, su marido i sus paryentes los mas serkanos.
- Michael Feige, aedado de 58 anyos, selebre sosyologo i anthropologo, profesor en la Universidad ‘Ben Gurion’.
- Mila Mishayev, aedada de 32 anyos, lakuala desha en dolyo padre i madre ansi ke dos ermanos i una ermana.
El padre de una de las viktimas eskrivyo. “Oy enteri mi ijo, mi dolor es muy grande i muy difisil a somportar; mi Vida no sera mas nunka la mizma…No keremos vengansa, keremos una solusyon.”
La ermana de İdo ben Ari deklaro “Mi Ermano era un ombre de paz, el tenia munchos amigos djudyos i tambyen arabos. El era yeno de djenerozidad i amor.”
De su parte, despues del dramatiko akontesimyento de Myerkoles la noche en el marketo de Sarona, la revista elektronika “Times of İsrael” publiko (por la segunda vez) un artikolo eskrito unos kuantos mezes antes, si no me yerro despues del ultimo akto de terrorizmo en Fransya, artikolo ke mos da aproksimativamente una idea de lo ke realmente dezean munchos Israelyanos i tambyen djudyos de la diaspora; teksto del kual topo oportuno de darvos la traduksyon mas o menos literal de pasajes ke me paresen ser muy sinyifikativos:
“Yo no so riko, ma me syento riko del amor de mi mujer, komo tambyen de mis ijos i de mi inyeta Maaya kuando una sonriza dulse illumina su kara….. Esto todo me mentyene en vida en un mundo ande syertos ombres pedrieron el meoyo… Ansi:
“Me espanto, no por mi, ma por todos los ke amo.
“Me espanto de un muevo “bataclan” o de un muevo “hyper-kasher”.
“Me espanto de un muevo Mohammed Merah ke puedra matar todos los ninyos djudyos.
“Me espanto igualmente kuando en Sisjordania keman ninyos porke son palestinyanos…
“Me espanto kuando dos soldados del Tsahal keman una bandyera palestinyana.
“Me espanto kuando todos, de las dos partes, se radikalizan.
“Me espanto kuando el fanatizmo eksklue el dubyo, este dubyo (i esta hezitasyon) ke munchas vezes son un manparo kontra todos los eksesos.
“Me espanto de estas olas de odyo i de rasizmo ke renden los ombres ( de ke relijyon ke sean) syegos i los pushan los unos kontra los otros. (fin de sitasyon)
Oy, alhad dia de Shevod meldi la monstruoza trajedia ke se bivyo en los Estados Unidos, a las horas sinko de la demanyana en un klub amerikano de homoseksuales de Orlando, krimen ke desho espandidos en basho 50 muertos i 55 feridos. Akto horrivle perpetadro por un mansevo Afgan espiritualmente atado a los prinsipyos del grupo terroristo DAESH, en sinyo de kastigo de “una diferente manera de bivir” prohibida en el pasado.
Akto ke es komo un horrivlo egzempyo del terrivle peligro ke komporta kualkyer ekseso, sea mizmo relijyozo, eskrito en los livros santos de las tres relijyones monotheistas...
Ekseso de pudor ke fue puede ser nesesaryo en el konteksto sosyo-kultural de los tyempos antikos, ma ke aktualmente en muestra epoka de progreso i adelantamyento, es realmente un horrivle akto kriminal.
“La vida es mas dulse kuando se konstruize pontes i no paredes” eskrivyo Belly Crystal en su livro sovre Mohamed Ali ke muryo unos kuantos dias antes. Ke la alma del grande boksor repoze en Ganeden.
