La isla Burgaz, es la tresera komo grandor de las İslas de Prens de Estambol, ande ay sharas (orman) de pinos (çam), i munchas kazas elegantes de tavla antiguas.
Bivir en esta isla es un privilejyo (ayrıcalık), para las personas. Aki no ay la nosyon del tiempo.
El tiempo pasa aki sin depender de unas kozas.
Demanyana dar un torniko en el bodre de la mar entre los arvoles de pino, djugar en el kafe unas dos manos de kartas, i la noche bever un poko es un divertimyento (eğlence). Dar un torno kon la barka, iyir a peshkar, kemar el ogar (mangal) para asar las karnes, djugar kon top, entrar a la mar son las aktivitades de la isla.
Burgaz es la isla la mas asolada (tenha) i la mas natural (doğal) entre las otras.
Burgaz es un sentimyento delisyozo, una amor, una pasyon (tutku) espesyal para los ke se auzaron a bivir aya anyos largos.
El Dyo ke mos ayege de iyir kada anyo a esta estimada isla, djusto komo un kazal chiko, ande se konosen todos i se saludan, avlan i burlan kon una kerensya ke no se topa en el dia de oy.
Kada anyo a la fin del mes de mayo, los aedados empesan a vinir, para pueder pasar un enverano alegre despues de un invyerno largo i yeno de problemas.
A poko a poko todos se arekojen i se entyende ke ya empeso los tyempos kayentes, i la sezon de entrar a la mar.
La semana ultima el kal de Burgaz se avyo kon grande eskarinyo i alegriya.
Ke ermozura de adjuntarse (kavuşmak) kon todas las karas konosidas !... kon unos kuantos mankos malorozamente.
La Sinagoga de Burgaz tyene un lugar emportante i espesyal entre los yahides.
Aki, todos son komo una famiya. Los aedados keren serrar el klima a kavza ke se yelan, los mansevos kon los rabinos aryento la sudor debasho los talletes lo avren para pueder respirar, los chikos gritan, koryen, suven a la Teva i se van allado del Grande Rabino para pueder oyir lo ke esta avlando.
El Grande Rabino Rav. İsak Haleva da una emportansa grande a los chikos i a las madres ke los engrandesen.
Mizmo ke azen muncho bruyido, no desha avlar a dingunos, a kavza ke kontinuen a vinir i ke se auzen.
Despues de la orasyon de Shabat, la seuda i el adjuntamyento (birliktelik) ke ay aya, las konversasyones tyenen una savor a parte.
Las vedruras, el ayre en el bodre de la mar, los arvoles, las flores, la natura; repozan a la persona, i dan una trankilitad entre las bozes dulses de los pasharos ke se mesklan kon la boz del chuflete (düdük) de los vapores ke akostan kada una ora. Los peshkados en la mar mostran ke ay una vida aryento de la agua.
En todas las famiyas ay munchas reboltinas, kon los echos, ijos, la sanedad i munchas otras kozas.
“En kada kaza una braza” diziya mi granmama (ke este en ganeden).
Ya es verdad, kozas ke no asemejan unos kon los otros. Para alesharmos de estas problemas de la semana i pasar un shabat i alhad en un kazal komo Burgaz es una shans grande para mozotros.
Alevantar temprano i ver el nasimyento del dia, la kolor kolorada del sol, kaminar una ora en el kamino entre los arvoles kon el ayre dulse, iyir a la mar, nadar, ver a los amigos, aunarmos kon los keridos; es una shena ke se bive kada anyo al empisijo de esta sezon yena de aktivitades.
Bivir en Burgaz es un privilejyo!...
