La Fransya de muevo en dolyo i el mundo undido a mitad en una esfera echa no solo de dolor i sufriensa ma tambyen de espanto ansi ke de una inkyetud perpetual ke se anchea progresivamente asta pareser engancharse al destino humano.
Djueves 14 del mes de djulyo, dia sakro para la Fransya, dia ke prekoniza las tres mas grandes valores humanas “la Libertad”, “la İgualidad” i “la Fraternidad”, djueves en Nice sovre uno de los bodres de la mar Mediteranea nombrado “la promenade des anglais” , aproksimativamente a las horas onze de la nocha, despues los fasinantes fuegos de artifisyo ke a eyos solos paresian konfirmar la signifikasyon de sus emblema, un largo kamyon de transporto se presipito al pareser syegamente, ma en realidad voluntaryamente sovre la muchidumbre de personas prezentes, en el objetivo byen vizivle de matar lo mas posivle de djente, personas aedadas, komo tambyen jovenes o ninyos, de ke fey o orijen ke fueran.
Djuevez a la noche, no fue solo la Fransya ke fue vizada ma la sivilizasyon en su totalidad.
Eskrivir sovre la desgrasya de este horrivle atentado es de una parte ‘repetar lo ke ya fue dicho varyas i varyas vezes en kavzos similaryos’ …ma de otra parte, ‘ no azerlo, no yorar kon los ke pedrieron sus keridos los mas serkanos’ es trahisar el mas importante Komandamyento de la Ethika Djudia, “No mataras” .
En munchos kavzos similaryos el Daesh ya asume i mizmo se puede dezir ya reklama immedyatamente kon glorya la responsabilidad del fakto , ma esta ves el tadro a azerlo. La trajedia se avia produzido djueves a la noche i esta terrivle organizasyon ke tyene komo solo objetivo “la muerte de los otros” lo izo solo Shabat. Deke este retardo?
Oy Lunes, tres o kuatro dias despues de la desgrasya, los kapos de los dos prinsipales partidos de la Politika Franseza se topan en estado de rivalidad, esforsandosen de afirmar kada uno su superyoridad en metyendo en evidensya las faltas posivles del adversaryo.
A este propozito, no se personalmente si el sinyor Strosi tyenen o no tyene razon de kritikar vigorozamente el Governo. İnkontestavlemente es su derecho i mizmo se puede afirmar su dover de azerlo, ma solo en tyempo de paz i no de gerra. En tyempo de gerra el fronte de kombate deve ser unido en un mizmo objetivo: “venser el enemigo komun”.
En uno de sus livros, el byen konosido eskritor fransez Romain Roland avia dicho “Meme sans espoir, la lutte es encore un espoir” (Mizmo sin esperansa, la lucha es syempre, a eya sola, una esperansa).
Aktualmente se trata prinsipalmente de no interrumpir el kombate ke syempre kontinua kontra el terrorizmo, de ser kada uno akavidozo i si es posivle perspikas, de formular kestyones afin de entender realmente el eskopo del enemigo i la razon mayor por la kuala el se obstina a preferar la muerte a la vida?
Kuala era la razon verdadera de este akto kriminal de djueves a la noche? ken pudo dar el orden de kumplir este djesto fatal? Entre las 84 personas ke pedrieron la vida i los multiples ferridos ke se topan aktualmente en varyos hospitales, figuran los nombres de munchos muzulmanos, i esta eventualidad no pudia ser inyorada de parte del matador.
Ken era Moohamed Lahouaiej- Bouhlel, el konduktor del kamyon? El era poko konosido de los servsyos de la polisia; puede ser ke tuvo problemas por chikos kavzos de ekseso de violensa verbal en sus momentos de ravya, o de ekseso de velosidad en konduzyendo su karo, ma nunka por faktos de terrorizmo.
Sus vezinos lo deskrivyeron komo un ombre al pareser introvertido, kaji syempre tasiturno ma sin kualkyer sinyo de violensa ni de fanatizmo relijyozo, salvo los kuatro o sinko ultimos dias ke presedyeron su akto kriminal, durante loskualos se remarko en el ‘sinyos de radikalizasyon’.
De orijen Tunizyana, instalado en el Sud de la Fransya desde puede ser largos anyos, el era diferente de los habituales jovenes kargados de djestos de terrorizmo, los kualos son por la mas parte konvensidos ke despues sus aktos suisidaryos, los asperan muy grandes rekompensas selestas….
Komo kombatir esta nebuloza eksesivamente perikoloza ke parese kerer espandirse en varyas tyerras del Norte de la Afrika? Oy en dia, es puede ser la kestyon la mas importante a formular.
