Despues ke la rejion kurda gano otonomia (özerklik) en el tiempo de Saddam, en el anyo 1991, Israel organizo dos operasiones sekretas para savlar los Judios de Kurdistan.
Los Benjews (los kurdos ke tienen raises judias) se estan keshando ke Israel no los esta akseptando a İsrael. Solo los ke tienen erensia a traver la madre pueden entrar. ‘Israel deve de akseptarmos” estan diziendo. ‘Mos konvertimos al İslam ma solo en nombre. Mos estomos sintiendo judios. Tenemos parientes en İsrael. Ma İsrael mos esta serrando las puertas’.
Munchos judios se konvertieron al İslam durante la persekusion de los judios, antes i duspues de la fondasion del estado judio. En los 1950’s, los dos tersios (üçte ikisi) de los 150.000 judios ke bivian en Irak, se fuyeron a İsrael o a un otro pais. Otros se konvertieron o se fuyeron de la persekusion del diktator Saddam Hussein.
El anyo ke pasimos, el ministerio de sujetos relijiozos en Kurdistan asinyo (atamak) un reprezantante espesial, Sherzad Mamsani, por la minorita relijioza judia, para pueder establisar buenas relasiones kon Israel. “No somos un konsulato de Israel, ni keremos trayer a los Judios kurdos de muevo a Kurdistan. Grupos pueden viajar de aya aki, i vamos a estar muy kontentes si azen inversiones (yatırım) aki” esta diziendo Sherzad Mamsani.
Sherzad Mamsani kere restorar la erensia judia en Kurdistan. Mamsani viajo a los Estados Unidos, i avlo kon el Kongreso. Les demando ayuda para restorar lugares komo las tombas de los profetas Nahum, Eliezer i Daniel.
En la sivdad Koya, kedaron munchos Benjews para establisar la identidad de la komunidad. Benjews aki se yaman ‘ermano’ de parte a parte, i por eyos no ay diferensia si son judios de la parte del ombre o del lado de la mujer. Azen kazamientos entre el grupo i afuera del grupo.
Puedesh rankontrar la erensia(miras) judia en Koya, en los viejos barios (mahalle) judios. Ay munchos anyos ke la sinagoga fue destruida. La majorita de los Benjews de Koya ya saven ande estava la sinagoga. “Agora ay un restoran en su lugar” estan diziendo.
Sharzad Mamsani keria avrir una sinagoga, ma agora troko de idea. Se esta espantando de una ataka de İran o de otro etado.”Durante 70 anyos la djente izieron sus orasiones en sekreto en sus kazas. La vida de las personas es muncho mas emportante ke konstruir una sinagoga’.
Mamsani, fue viktima de un ataka en los anyos 1990’s, i perio una mano. ‘No savemos lo ke mos esta asperando en esta rejion en el futuro. Asperimos setenta anyos, ya puedemos asperar un poko mas’.
La majorita de los Benjews no saven nada sovre la relijion judia, los kustumbres i las orasiones. Por esta razon, Mamsani esta avriendo un sentro kultural en Irbil. Este sentro se va yamar Sentro Assenath – ke es el nombre de la famoza mujer rabino del disetien siglo. Eya dirijava una universidad judia en Kurdistan.
“En este sentro, vamos a ensenyar las kreaturas de todas las relijiones sovre el judaizmo. Un rabino va estar aya i les va ambezar el judaizmo. El objetivo prinsipal de esto es trokar el predjudizmo sovre el judaizmo, ke fue la kavza de tantas persekusiones en la rejion’ esta diziendo Mamsani.
