Savyendo Moshe Rabenu, ke las diyas ke le restaron de bivir son pokos, sigun el orden del Dyo, deve murir en el dizyerto, i non entrar a la tyera de Kenaan, mando a yamar a todo el puevlo Djudyo, en el kuaranten anyo ke salyo el puevlo del Ejipto.
Enterval de este tyempo, estuvo avlando i dandoles de entender a el puevlo dizyendo ke perkuren por el sostimyento de la ley. Ke solamente ansi es ke pueden egzistir i prosperar.
Entre sus palavras, les izo akodrar los pasajes ke paseran dizde ke salyeron del Ejipto fin akel diya; la maraviyas i los milagres ke izo el Todo Poderoso kon los Ejipsiyanos en favor de el puevlo Djudyo. El diya tan gloryozo del resivimyento de la ley en el monte de Sinay. La vista temerozo ke vyeron kon sus ojoz. Las milagras i las pasajes temorozos ke pasaron en el dizyerto, la desgrasya de la echa el bezero de oro, el mal ke trusheron los doce eskulkadores. La viktorya ke tuvyeron kon los doz reynados Sihon i Oc.
Despues les deklaro todo lo ley ke enkomendo El Kriyador. Lo ke deviyan de azer i lo ke no deviyan de azer.
Moshe Rabenu les enkomendo ke syempre deven de ovedeser las komandos de la ley, sintir a sus giadores.
Agora era la ora de prezentar a Toshua bin Nun dizyendo, ke el va ser sus giador, i kon el vana entrar a la tyera prometida, a la tyera de Kenaan. Espartyo a kada triva i trivo el luguar onde i va ser sus moradas i su terminos.
