Irogi a El Kriyador en akel tyempo dizyendo, “Sinyor de el Mundo rogo azeme pasar i vere la buena tyera akel monte bueno, i el Levanon”. Se ensanyo El Kriyador i me disho, “basta no me avles mas sovre este sujeto”.
Ansi enpesa la perasha de Vaethanan. Moshe Rabenu tyene un dezeo de ver la tyera prometida a nuestros avuelos. Por tanto El Kriyador ya le disho ke el no va entrar a la tyera santa. El pastor fiel Moshe Rabenu estuvo 40 anyos cuntos kon el puevlo Djudyo en el dizyerto. Ya arivaron a el momento ultimo ke ya eran prontos a entrar a la tyera de Kenaan. Malgrado todo Moshe Rabenu aze 515 orasyones ke le aga una mersed ke se apiyade e el alo manko de ver solo esta tyera prometida. Por ke Moshe Rabenu ya savia muy bueno ke El Kriyador es grasyozo i piadozo de este kavzo deprenden nuestros savyos i dizen en el Talmud: La orasyon es mas valutoza afilu de azer echas buenas. Ansi le responde El Kriyador, “suve a la punta de pisga i alsa tus ojos al oksidente, i al norte i al sud, i al oryente, i mira kon tus ojos, por ke no pasaras este Yarden”.
Moshe Rabenu, por ke le kumpla El Kriyador este dezeo, izo munchos dialoges aprovo de orasyonar, rogo ke El Kriyador le kumple este dezeo. Le disho a El Kriyador “permeteme de ver la tyera”. Pense entre si, si le avra permeter de verla puede ser se apiaderiya i lo aziya entrar.
Ma alkavo entendyo Moshe Rabenu, mas no le aprovechara ni orasyones ni rogativas la setensya ya fue dada: Ma por tanto devemos de saver, de no kontentarmos kon una sola orasyon si no ke devemos de pujar las orasyones por kavza ke El Kriyador dezea las orasyones de los custos. I tambien ke la orasyon es mas valutoza i grande, de las echas buenas ke se azen sin orasyonar.
