Alhad la tadre bivimos una nochada muy emosyonante kon el konserto de la sinyora Fani Hodara, kompozitora i piyanista ke tiene una fama internasyonal i reprezento muesto pais, la Turkiya en munchas kompetisyones muzikales en munchas sivdades de la Evropea mizmo en el Eurovision.
Fani es reelmente una kompozitora muy importante. Este invierno vamos a tener la posibilidad de oyir sus kantikas en un filmo ke se va realizar en munchas partidas en un kanal de TV. Estan djugando i Fani esta kompozando kantikas para azer el filmo mas atraktivo....
En empesando su konserto, la primera kantika era una kompozisyon ke fue kompozada en memoria de su amigo, el poeta, el filozofo Meir Gaon, marido de muestra kerida Şeli Gaon. Meir le avia eskrito un poema para Fani, por su talente. Reelmente este fue un djesto muy fino de la parte de Fani. Este kante me plazio muncho; no so una otoridad para apresiar el kante, mizmo puedeser me plazyo porke era dedikado a muestro karo amigo Meir Gaon.
Kada enverano tenemos el plazer de partisipar a siertos konsertos, konferensyas, konversasyones i diskusyones (söyleşi), teatros i todo modo de aktividades.
Dos semanas antes tuvimos el plazer de oyir al Sinyor Alper Almelek. Le plaze avlar. I mos avlo mas de una ora sovre los diridjentes de kompanyias internasyonal mizmo nasyonal. Dospues de oyir a Alper, siertas personas koma mi mizmo si no son patrones muy importantes (no se kualo deve de ser importante; si tenesh 150 lavorantes i foksyonaryos sos patron importante o no?) empesaron a pensar kuando estan en el lavoro avlando a las personas ke fonksyonan komo partisipantes del lavoro...
Alper, el anyo pasado mos kanto los sonets de Shakespeare por la primera vez en muestro pais. El reelmente tiene munchas ideas, i aze lo menester para ke estas ideas sean pratikadas. En su prezentasyon mos avlo de un sitio internet ke estan propajando (yaymak) kon sus noventa eskritores. El nompre es “Püflü Şeyler” (para siertas kozas empleamos la palavra para kozas enmofesidas “Küflü Şeyler”; i por siertas kozas interesantes dizimos “Püf Noktası” en Turko. I a el le plazyo de meter este nombre.
Este alhad vamos a tener el plazer de arresivir una artista poloneza, Wioleta Komar, ke es bastante renomada mizmo en Broadway. Mos va prezentar un drama sovre la vida de una diva ke bivio durante la segunda gerra mondial i ke era una kantadera. Vamos a tener la okasion de observar esta piesa el 28 Agosto en el Anadolu Kulübü a las 8 de la tadre. Mizmo si no sosh miembros tenesh la posibilidad de partisipar.
