I sera ke kuando vineresh a la tyera prometida ke El Kriyador te da por eredar, i la eredaresh i moraresh en eya tomaras de todos los primeros frutos de la tyera, i las pondras en un sesto, i andaras al lugar ke El Kriyador eskojera ayi su nombre, i vendresh a el Koen ke fuere en akeyos diyas. I tomara el Koen los frutos, i los pondra delantre de la ara del santuvaryo de El Kriyador.
Kualo era el eskopo de esta enkomendansa? En akeya epoka kada uno i uno aziya su orasyon sigun se konsintiya ansi i denusyava a El Kriyador todos sus dezeyos de su korason. En dando los primeros frutos a el Koen en el santuvaryo delantre de El Kriyador en orasyonando i akseptando ke todo lo bueno ke el poseda es una dadiva de El Kriyador bendicho el.
El savyo Arambam en el livro ‘More Nevuhim’ trae una razon por esta enkomendansa dizyendo: “Aregalar los primeros frutos es enforteser la persona ansi mizmo la natura de jenerozidad i apokar sus dezeos de su alma”. Tambien esta mitsva, enkomendansa enbeza a el ombre de ser umilde. Akeya persona ke es patron de kampos i vinyas el mismo esta tomando el sesto de frutas en su ombro, i se lo esta yevando a el santuvaryo a darselo a el Koen. Dunke este djesto aziya akodrar ke nozotros fuimos esklavos en Ejipto a Paro i agora El Kriyador nos dyo muncho bueno i rikeza. Komo lo meldamos en la perasha ‘Ekev’, “no seya ke komeras i te artaras, i fraguaras kazas buenas i moraras en eyas, i tus ovejas se muchiguaran. I plata i oro posedaras en este estado se enaltesera tu korason i te olvidaras del Kriyador. Az muncho atansiyon en el tyempo ke estas en la bondansa de akodrarte ke El Kriyador tu Dyo es ke te da fuersa por azerte reushir en tus lavoros”. Oy ke no tenemos la enkomendansa de Bikurim los primeros frutos, no devemos de olvidar la mitsva de tsedaka. La tsedaka balda las setensyas fuertes. La tsedaka eskapa a la persona de la muerte. Komo lo disho Yermiyau el profeta de boka del Kriyador, aze tsedaka kada uno sigun su posibilidad komo yo ago kon vozotros, ansi baldare todas las setensyas
