Savesh ke el shifro ke vash a deklarar va ser kritikado par todos. Todo modo de personas van a topar de avlar sovre el shifro de la populasyon deklarada.
Reelmente no es fasil de kontentar la djente malgrado ke dar una informasyon no es una koza para kritikar.
Todos savemos ke despues de la situasyon politika en Turkia ke bivimos el anyo dalkavo kon los atakos teroristos, kon las bombas bivas i kon la demokrasia ke no es aprovada por todos, munchos mansevos pensan de estudiar mizmo de bivir en la Evropa, en las Amerikas o en Israel, puede ser para tener un futuro mas seguro.
Reelmente los kavzos de diziochomil. Ma esto puede ser ke no es la population ke bive oy en día en muestro país. Porke kada anyo ay mansevos ke se van a paizes komo Israel i paizes Europeos o Amerikanos. I malorozamente komo siertos paizes, no tenemos una population Djudia ke vienen en Turkia. Es djusto ke tenemos un grupo de muzisyenes Israelis de origin persiana ke baylan i kantan en las kayes. Komo los Israelyanos ke biven en otros paizes no les plaze ser miembros de la komunidad ande biven. I kale achetar ke la mas grande partida no son muy relijiozos.
Komo muestra komunidad es aedada, kada anyo tenemos mas munchos muertes ke nasimientos mizmo ke la edad una sovre otra esta mas alta ke los vente anyos dalkavo. La sola koza ke puede ayudar para ke muestra komunidad no se amengue es los kazamientos mikstos - judio/judia kon un /una musulmana/musulmano o un kristiano/kristiana. Savemos ke no devemos de tener un problem para las kreaturas de madre djudia ma de ves en kuando kreemos problemas para kastigarlas (cezalandırmak) porke se kazaron kon maridos ke no son djudios. El anyo pasado la mas grande partida de estas kriaturas kijieron azer sus bat/bar mitzvas. Savemos ke dainda en muestro pais en las kartas de identidad se topa la relijion de la persona i esto es la relijion del padre. La kriatura nasida/nasido de un padre djudio i de una madre non-djudia tiene en su karta de identidad eskrito: djudio/djudia. I la mas grande partida kreo ke se sienten ke son djudios. Esto es un problem muy importante para el futuro de muestra komunidad.
Siertas personas pensan ke los diridjentes de la komunidad esta dando shifros mas altos para ke la komunidad no piedra su identitad de Komunidad. Esto no es djusto por ke mizmo si ay diez mil almas, semos una Komunidad i dingun shifro no es una razon para piedrer esta identidad de Komunidad.
Los diridjentes i los miembros de muestra komunidad tenemos komo dover de azer todo lo ke puedemos para bivir en muestro pais en las mijores kondisyones. De vez en kuando, puedemos tener siertas difikultades de punto ekonomiko o sosyal. Ma esto no deve de ser una razon para ser demoralizado.
Kon la populasyon ke se esta enviejesiendo, tenemos el menester ke muestro Ospital sea en una buena situasyon. Puedemos dizir la mizma koza para el Or-Yom, ke es el Sentro ande biven las personas aedadas i las personas ke tienen de menester de topar una kaza. Ay dos anyos ke las dos kazas ke teniamos, el Moshav Zekinim i el Barınyurt son oy en dia aunados en un Sentro. I kreo ke esto fue por el provecho (menfaat) de muestra komunidad i tenemos mankos gastes para estas kazas ande biven en buenas kondisyones mizmo si no es la mizma koza ke de bivir en su kaza.
Oguro fuersa a todos los ke estan lavorando para el bien de muestra Komunidad i kale kreer a los ke los diridjentes deklaran mizmo sovre la populasyon de la komunidad.
