Verso la fin de los anyos ochenta, empesi a enteresarme kon muestra lingua: el judeo-espanyol. En akeyos anyos konosiya solo el “Aki Yerushalayim” komo revista ke aparesia en esta lingua.
En el anyo 1989 tuve la okazyon de partisipar al Kongreso organizado por la Asosyasyon Morit enkavesada por el Dr. Gad Nassi ke malorozamente mos desho la buena vida la semana pasada. En este kongreso ke era el primer ke tuve el mazal de partisipar sovre este sujeto (istoria de los djudios otomanos i turkos i la kultura sefaradi) konosi munchas personas ke reelmente son dainda muy importantes para muestra erensia. Es aya ke konosi al Profesor Haim Vidal Sephiha, es aya ke konosi al sinyor Moshe Shaul ke es uno de los fondatores de la revista Aki Yerushalayim. Es aya ke konosi el muzikologo Edwin Seroussi. Es aya ke konosi al Professor Jacob Hasan, z”l, ke era un ombre de sensia. Es aya ke konosi al sinyor Dr. Gad Nassi ke fue el organizator de esta organizasyon reelmente maraviyoza ande tuvimos la posibilidad de vijitar dos ekspozisyones muy importantes. La primera en el Muzeo de Israel en Yerushalayim, organizada por las sinyoras Ester Youhats i Miriam Katz, orijinaria de Izmir. La ekspozisyon era una ekspozisyon etnografika sovre los djudios del imperio otomano i la republika turka. Ay un livro ke fue publikado sovre esta ekspozisyon maraviyoza i oy en dia la livreria del Şalom lo tiene dainda en sus tavlados (raf). Se esta dainda vendiendo dospues de ventiocho anyos. La segunda ekspozisyon era organizada por el Museo de la Diaspora “El Beit Hatfutsot”, ande tuvimoz la okazion de ver munchas fotografias reelmente istorikas sovre los djudios turkanos. Tanto me entereso ke merkimos una kopia de esta ekspozisyon para ekspozar en Estanbol i en Turkiya. Esto todo era las ideas del Dr Gad Nassi. Ke su alma repoze en Ganeden. El era en el mizmo tiempo autor de siertos livros sovre la kultura i la lingua sefaradi.
Dospues de su pedrita ayer esta fin de semana tuvimos siertos e-mailes en el Ladinokomunita; ke kreo ke es el sitio el mas emportante ande se avla sovre muestra lingua i kultura, ande mos dava un avizo triste ke mos anunsiava la fin del Aki Yerushalayim. Reelmente es muy difisil de dar fin a una revista ke fue un elemento muy emportante para el mantenimiento de muestra lingua anyos enteros.
I pensi ke reelmente en muestro pais en Turkiya es may kolay de publikar gazetas i livros. Mizmo es mas barato ke Israel i los payizes evropeos. I eskrivi ke muestro Sentro en Estanbol esta pronto para publikar esta revista un sierto tiempo i de dar dospues a una mueva ekipa israelyana sus trezoro. Kreo ke Israel va ser el pais dalkavo ke va reushir a mantener esta lingua i kultura porke es su dover de azer esto, teniendo una ancha populasyon de Sephardim en sus tierras. Munchos anyos Moshe Shaul, Zelda Ovadia, el diplomato Mordehai Arbell, el profesor Avner Perez i la sinyora de los kuentos Matilda Koen-Sarano reelmente lavoraron para mantener esta revista i reusheron.
Estos dias vamos a meldar elektronikamente el numero 99-100 de Aki Yerushalayim ke va ser un numero kreo muy spesial. Ma mi dezeo es de ver el numero 101 i 121 mizmo si tenemos solo dos numeros al anyo. Espero ke este numero no va ser la fin de esta maraviyoza revista ke kero tenerla en mis manos, no kero verla en el komputer o en mi telefon para no toparlo una otra vez kuando esto bushkando.
