La semana pasada tuve la posibilidad de eskrivir mi artikolo en el aeroporto asperando el aviyon. I lo eskapi en el aviyon. A la demanyana en indome a un randevu kon un kliente me akodri ke no estava terminado i kon el palto en la kamareta lo koriji i lo eskapi. Komo di la promesa de eskrivir kada semana devo de akumplir este dover. Estava en Paris por un echo profesyonal. A la demanyana kuando abashi a la sala del dezayuno verso las ocho vos djuro ke avia a penas trenta-kuarenta personas en la sala. Vos esto avlando de un otel de kinyentas kamaretas. Es djusto ke es un business-otel ma komo me kedo en este otel kuando me vo por echo es muy yuch de topar un lugar para el dezayuno. El segundo diya fue la mizma koza.
Tuve la posibilidad de pasear solo una noche en las kayes de Paris. Verso las mueve komi en un restoran. I komo estava muy kansado keriya tornar al otel kon un taksi. Komo no se topa kon fasilidad estava dezesperado para topar un taksi en Los Kampos Elyseos (Les Champs Elysees). De ke sali a la avenida esto viendo kuatro o sinko taksis kon sus luzes vedre ensima. Vos puedo djurar ke es la primera vez ke esto viendo tantas arabas kon sus luzes vedre ke sinyifika ke son vaziyas. Me suvi i avlando kon el shofor; se estava keshando de los malos echos porke no ay bastante turistos en esta sivdad ke es una de las tres sivdades las mas vijitadas por los turistos en el mundo. I vimos ke dospues de las lokuras de los teroristos ke atakaron en primero a la revista de shakaikas, Charlie Hebdo, matando dodje jurnalistos. Dospues vimos el masakro del teatro de Bataclan ande mataron serka de noventa personas i dospues en otros lugares komo el supermerkado Kasher. Serka de syen i kuarenta personas toparon la muerte en estos atakes teroristos. Savemos ke estos dos evenimiyentos se realizaron en el anyo 2015.
Dos mezes antes estava de muevo en Paris i vide en las gares i en siertas plasas soldados armados ma no fui tanto impesionado. Ma esta vez avlando kon siertas personas entendi ke mizmo en Paris estan resiviendo manko turistos ke dos anyos antes i reelmente komo Estanbol i la Turkiya ke es mas muncho tokada estan dezrepozados de esta situasyon.
Jugeves kuando torni i estava en Estanbol kon grande kuryozidad demandi lo ke estamos aziendo para selebrar la fiesta de Hanuka en la kaye. El anyo pasado en Ortaköy, debasho de una meshkita fraguada por un arkitekto Ermeni (de la famiya de los Balyanes) selebrimos kon muncha djente la noche dalkavo de Hanuka. Reelmente no era muy siguro para azer la mizma koza en las kayes. I para dar un aver ke Estanbol es siguro, los diridjentes de la Komunidad Djudia kon los Ofisieles i kon el prezidente de la Munisipalidad de Beşiktaş, desidyeron de azer este evenimiento djusto allado de la plasa ma en un lugar partikular ke se puede kontrolar. En el “Esma Sultan Yaslısı” ke es una grande guerta ensima de la mar. Kale achetar ke no avia la mizma djentoria ke el anyo pasado.
Estamos viendo reelmente ke el terorizmo es kapache de limitar muestras vidas i el modo de bivir.
Para terminar vos kero dizir ke dospues de munchos anyos asendimos la Hanukiya en Edirne. Tuvimos un grupo de ochenta personas ande la mas grande partida biven en Göktürk - Kemerburgaz ke fueron a vijitar Edirne kon el kal i la vijita de la sivdad. Sin olvidar, organizaron una komida kasher kon ligado echo a la manera de los Djigerdjis Edirnelis kon ligados kasher.
I esto es la mueva moda para los ke miran o no miran el kasherut.
