Kuando me asenti para eskrivir un artikolo el segundo dia del muevo anyo el primer sujeto ke devia de eskrivir era el muevo anyo i la desgrasya ke bivimos en Estanbol una ora dospues del empesijo del muevo anyo. En el 2016, reelmente muestro pais tuvo muncho kon los evenimientos teroristos ke tuvieron kavzo en muestro paiz, i vimos ke munchos turistos preferaron de no vijitar muestro pais.
La noche ke selebrimos el nuevo anyo, a las una de la demanyana un teroristo (loko) kon su arma kaleshnikof atako el Klub famozo Reyna ke se topa en el bodre del Bosfor para matar trenta i nueve personas i de ferir mas de sesenta i nueve almas. La mas grande partida de estas personas eran turistos ke venian para selebrar el muevo anyo en Estanbol. Personas orijinarios del Lebanon, de la Arabie Seudit, de la Jordania, del Maroko i de munchos otros paises del Medio Oriente. Dospues de los atakes teroristos kontra los turistos en Estanbol, la mas grande partida de los turistos ke kontinuaron a vinir a muestro pais i a muestra sivdad fue los Arabos i los orijinarios del Medio Oriente. En los lokales los mas famozos puediash ver munchos turistos de estos orijines. Malorozamente no se lo ke va afitar dospues de este evenimiento. Van a kontinuar a vinir o no. Vamos a ver.
En el empesijo de mi artikolo pensi ke no devia de eskrivir sovre este sujeto, ma no fue este modo i otomatikamente empesi a eskrivir sovre este kavzo porke ay kuarenta i ocho oras ke estamos biviendo, oyendo i sigiendo solo este sujeto. No vos espantesh para El Amaneser; tuve el koraje de eskrivir un komentaryo sovre dos livros.
El primer dia del muevo anyo komo todas las fiestas es una tradision de suetar todo lo bueno para el futuro. I este anyo augurimos buenos dezeos para el anyo venidero. Ma estos dezeos turo solo una ora i kinze puntos.
Keridos lektores del Şalom, normalmente artikolos politikos eskritos en Judeo-Espanyol no son el buto de muestro semanaryo. Ma komo no eskrivo artikolos en turko, esta oja es lugar ande puedo esbafar. I esto eskrivyendo lo ke penso.
A la fin eskrivi lo ke me vino al tino kuando me asenti a eskrivir. Vos auguro dias yeno de pas, de repozo i de seguridad.
