La semana pasada telefoni a Karen para demandar kualo afito kon el dalkavo numero de Aki Yerushalayim ke se devia publikar el anyo pasado (fin de 2016). Le demandi si era un Aki Yerushalayim en papel o elektroniko? Me disho ke devia de ser publikado i me disho ke no lo resivio. Deve de ser ke no lo publikaron! Dos dias despues Dora Niyego mos embiyo kon e-mail el artikolo sovre el dalkavo numero de Aki Yerushalayim (99-100) ke no topimos el plazer de resivir. En el site de internet “Kol Sefardim” avia un interviu kon Moshe Shaul i Zelda Ovadia kon el djornalisto Daniel Santacruz. I aya vide ke el numero dalkavo fue publikado. I estava kontente de verlo.
Moshe i Zelda fueron reelmente los gerreadores de esta lingua i kultura, Moshe mas de trenta i sinko anyos i Zelda kreo mas de vente i sinko anyos. No kalia ke este viaje se eskape este modo. En el interviu, Moshe esta avlando del ayudo material de la Autoridad Nasyonal, ke es una organisasyon ofisyal o governomental para la revista “Aki Yerushalayim” ke se publika en Israel, ke es el payis ke deve de ser la kuna de todas las kulturas djudias. Esto avlando de Israel ke es el payis ke obtiene el mas grande montante por persona de kada punto del mundo komo donasyones. “Aki Yerushalayim” no devia de bivir estas difikultades. Kreo ke no es la kulpa del estado o del governo ma es la kulpa de las personas ke biven en Israel i ke se enteresan kon esta lingua i kultura. Devian de vijitar el ministro de la kultura; el primer ministro mizmo el prezidente de la Republika para darles a entender la emportansa de muestra lingua i kultura. Es djusto ke oy en diya el Ebreo i la Kultura Ebraika es muy emportante i ke no se kompara kon la Kultura Judeo-espanyola, ma esto no da razon a los ke no dieron apoyo a la kultura de muestros avuelos.
Moshe i Zelda estan avlando ke van a kontinuar sus esforsos en el internet. I esto puedeser va ser mas interesante porke van a pueder meter siertas muzikas o siertas kozas para oyir i ver ma kreo ke no va ser sin problemes dospues de esta aedad porke el internet es la okupasyon de los mansevos. Mizmo yo ke ize mis estudyos en este kampo (elektronika i telekomünikasyon) no so muy esvelto komo los mansevos. I va ser la mizma koza para eyos si no van emplear profesyonales. Puedeser tienen razon. Ma kreo ke no va ser la mizma koza. Porke 25 anyos dospues no vamos a topar el mizmo plazer para meldar un artikolo ke fue eskrito en el enternet. I no se si va ser muy kolay de toparlo. Kuando disheron ke este numero va ser el dalkavo, avia eskrito un artikolo ande les prometi ke puediyamos publikar un sierto tyempo esta revista en Estanbol kon los direktifes del ekipo israelyano. Kon sus nombres. I kuando van a tener la posibilidad de publikar de muevo en Israel lo van a azer. El nombre les apartiyene ma no kijeron. Kreo ke el problem el mas emportante es ke no fueron sostenidos por los mansevos i no toparon mansevos ke les van ayudar i ke van a ser los muevos gerreadores.
Kero rengrasyar Moshe, Zelda, el Profesor Avner Perez, el diplomat Arbell (ke mos desho la buena vida el anyo pasado) i todos los ke lavoraron i eskrivyeron para esta revista.
