Es en el Ladinokomunita ke me ambezi de Bryan (miembro del grupo) ke ay un filmo intitulado “Salvado por la lingua” ke va ser prezentado el 23 de Febrero en la Universitad de Paul en Chicago i el 8 de Marso en el Instituto Cervantes en Sofia. Demandi a Karen ke es lo ke se trata en este filmo. Puedeser lo puedemos mostrar en el DIDL, 2017 en Estanbol. I me konto ke en el filmo de Susanna Zaraysky ay siertos reportajes en judeo-espanyol ke se realizaron en Sarajevo.
Kero empesar en lamentando ke no puedimos realizar siertos filmos sovre los ladino-avlantes – mizmo mansevos - en muestra sivdad. Por esta mankura, munchas personas pensan ke esta lingua no se avla en Estanbol. Este anyo estamos selebrando el DIDL el 4 i 5 marso. Shabat la noche (motsei-shabat) i dia de alhad. Susanna Weich-Shahak, profesora de etnomuzikolojia va ser muestra envitada de Israel i vamos a tener el plazer de sintirla. Unas semanas antes eskrivi ke mos esvacheyimos de azer este dia internasyonal porke munchas personas no van a kerer vinir a Turkiya dospues de siertos evenimientos teroristos. “Inat”, mos estan eskrivyendo ke keren vinir. “Hosh Geldiniz”. Si ay dies personas ke keren vinir vamos organizar un program ke va empesar el diya de jueves (deven de ser en Estanbol noche de mierkoles – el 1 del mez de marso). Keremos azer esta aktividad en el Oditoryum de muestra Eskola.
Noche de Alhad, pensamos azer un konserto de muzika kon “Los Pasharos Sefaradis” ke mos van a kantar tangos en Judeo-Espanyol del Dip del Baul. Este konserto va ser ornado kon una konferensya de la profesora Shahak. Deke keremos azer este envenimyento en el Oditoryum? Porke esperamos ke munchas personas komo los anyos pasados van a kerer partisipar; i komo esta vez es un evenimyento repartido en dos diyas va ser mas kolay i mos vamos a kansar mas manko. Los dos anyos pasados resivimos mas de kuatroshentas personas kada anyo.
Kada anyo ago lo ke puedo para dar apoyo a esta aktivitad. El anyo pasado avli sovre los elementos Sefardis de muestro Muzeo. Este anyo si va reushir a alkansar para provar ke esta lingua se avla dainda en muestra komunidad kero aparejar una avla sovre las tombas eskritas en judeo-espanyol. Esto mos va reflektar muestra lingua ke empleamos. Si pensash en turko vash a eskrivir en turko; si pensash en fransez, ensima la piedra de la tomba vamos a ver una eskritura en fransez. I puedesh kreer ke puedemos topar eskrituras en munchas linguas: turko, judeo-espanyol, fransez, ebreo mizmo italyano… Ya se ke munchos akademikos istorikos azen bushkidades sovre las tombas para saver mas muncho la istoria de la komunidad, ma no vide un lavoro sovre las eskrituras en judeo-espanyol en muestros simiteryos.
Süzet Herman, Anna Eskenazi i Karen Şarhon estan lavorando para prezentarmos una parodiya mueva. Ya se ke Forti Barokas izo su lavoro para su prezentasyon. Diya de lunes propozaron a Soli Avigdor de tomar la shena para un monologo. I ay siertos mansevos – o mas mansevos de los otros – ke keren tomar la palavra en este diya.
Si keresh partisipar a este DIDL de 2017 en Estambol, eskrivi a:
[email protected] i a [email protected] o telefoná a Karen Şarhon: +90 542 4258176. Vamos a anunsiar el program entero la semana ke viene. Vos asperamos komo kada anyo a muestra aktividad.
