El anyo pasado estavamos orgolyozos de estar kon kuatroshentas personas en el treser diya del Ladino. I este anyo aviamos pensado ke lo puediyamos organizar reelmente internasyonalmente komo el nombre. Avyerto a todos los ladino avlantes del mundo i organizando tres-kuatro diyas un tur turistiko sefaradi en muestra sivdad i en Andirne. Malorozamente no lo puidimos realizar porke la situasyon politika no estava dispuesta. I malorozamente mizmo si no estamos bivyendo evenimientos non agradavles, el punto de vista de los ke no biven en muestro pais es diferente.
Este anyo lo organizimos en el Oditoryum de muestra eskola ke es una sala de kuatroshentos i sinkuenta personas i reelmente es muy luksuozo. I dos diyas, Shabat a la noche i diya de alhad. Mos demandaron deke dos diyas. Shabat la noche, teniamos una konferensia de la famoza muzikologa Susana Weich-Shahak ke mos avlo sovre los tangos sefardis kon siertos ekzemplos ke arekojo de siertas partes de los Balkanes i de Israel. Dospues tuvimos la posibilidad de estar kon Los Pasharos Sefaradis i oyimos los tangos sefardis ke van a estar en un CD en poko tiyempo. Reelmente los muzisyenes ke lavoran kon Karen i Izzet son muzisyenes de grande valor.
Alhad kon un tyempo de primavera los Ladino avlantes preferaron ir a los kampos i al bodre de la mar al lugar de venir i pasar el diya en un salon. Ma los ke vinieron estuvieron muy kontentes de sintir mizmo siertos mansevos komo Can Evrensel, Ceni Palti i Anri Çiprut; kada uno avlando sovre un sujeto diferente. Ceni i Anri mos avlaron sovre el sit internet ke formaron “avlaremos”, ke mete artikolos sovre el antisemitismo. No vos enganyesh, no es en Judeo-Espanyol. Solo el nombre es en esta lingua. Ay todo modo de personas i jornalistos ke eskriven en este sitio.
Süzet, Anna i Karen fueron el trio ke mos kontaron siertas istoryas en eskapando kon Djoha. Reelmente las tres kuando avlan el Judeo-Espanyol la djente las oyen kon grande atension. Ma Süzet es partikular i es komo un komputador; sin emplear papel para meldar mos puede kontar diyes vezes la mizma koza sin saltar un biyervo. Bravo.
En este diya Forti Barokas mos konto los kuartieres ande moraron los Djudios en Estanbol. Mos konto sovre Hasköy, sovre Balat i sovre la Kula ke fue el kuartier el mas famozo en la vida de los Djudios Estanbollis.
El Rav Adoni mos avlo sovre la Ketuba, Dora Niyego mos konto siertas konsejikas, Esti Saul avlo sovre la “Ikona de Moda” de noventa i sinko anyos. El Hahambashi Haleva mos avlo sovre sus rekuerdos. Carolina Spiegel mos konto lo ke esta aziendo en su projekto sovre el Judeo-Espanyol en Turkiya i sovre los intervius ke izo en Estanbol i en Izmir.
Kero eskapar kon lo ke yo avli o kije avlar en este diya. Kije avlar sovre las eskriturias en Judeo-Espanyol ke se topan en las tombas de los simiteryos d’Estanbol. Malorozamente no meldi lo ke devia porke los ke estavan en la sala no fueron kontentes de oyir lo ke esta eskrito ensima de las tombas.
El anyo ke viene vos prometo de kontarvos una koza mas alegre…
