En la perasha AHARE nos enbeza el sirvisyo ke aziya el Koen Gadol en el santuvaryo, en el diya de las perdonansas, Yom Kipur.
Arambam la Mishna la eksplika dizyendo: “Kuando el Koen Gadol tornava a su kaza despues ke kumplyo su sirvisyo, lo akonpanyavan asta su kaza. I aziya un banketo a sus keridos por ke tornava a su kaza sano i rezyo”.
El banketo ke aziya el Koen Gadol era por ke no se danyo en el santuvaryo la ora ke el izo su sirvisyo. Un Koen ke no era partenesyente por azer el sirvisyo de el diya de las perdonansas, no puediya salir bivo de el santuvaryo. I por esta razon es ke el Koen Gadol no deviya alargar su orasyon, por no azerlos dezesperar a el puevlo.
El banketo ke aziya el Koen Gadol en su kaza le enteresava a su persona. El Koen Gadol deviya ser kazado, i orasyonar por su famiya i no solo por si. Antes de el diya de las perdonansas se deviya apartarse de kaza, i santifikarse. Kuando ya izo su sirvisyo ke ya fue resivido de parte de El Todo Poderozo, tornava kon alegriya a su kaza onde su famiya.
El sirvisyo ke aziya el Koen Gadol en diya de Kipur era por santefikar a el mundo el este. Tomar la santedad de las alturas i abasharla a el mundo onde bivimos nosotros. Ansi en tornando el Koen Gadol a su kaza trayiya kon si la santedad a su kaza i a el mundo.
Semejante a este sujeto, lo rankontramos en Rabi Akiva ke es dicho por el, “entro kon pas i salyo en pas”. Rabi Akiva estudyo todos los sekretos de la Tora. Este estudyo no lo izo solamente para si solo si no por enbezarlo a el mundo entero.
El eskopo de la kreasyon de el mundo es de azerle una morada a El Kriyador en este mundo por traer la santedad de las arturas a el mundo el este.
En el livro ‘Tana deve Eliyau’ meldamos: “Ansi dize El Kriyador a Israel, ‘yo kualo dezeo de vosotros? De amarvos unos kon otros i de onorarlos unos kon otros.”
Komo El Kriyador se apiada kon todas las kriansas, i nosotros devemos de apiadarmos de unos a los otros, seya moralmente seya materyalmente. Kada persona es presyozo verso El Kriyador, por ke es su kriyansa. I nosotros devemos apresyar a todo persona por ke todos somos kriyansas de El Todo Poderozo. Malgrado todos nos defektos, El Kriyador syempre esta entre nosotros.
Ashohen itam betah tumotam.
