Oy, dospues de una organizasyon reelmente ke no se realiza muy kolay esto mas repozado para eskrivir un chiko artikolo sovre el diya ke pasimos en Andirne kon serka de kinyentas personas. Me fui un diya antes para ver lo ke se pasa. Avia un tyempo maraviyozo kon sol i 30 grados de kayntor ma komo tenemos los telefones ke son entelijentes miri lo ke puede afitar: la noche vamos a tener luvyas fuertes en siertos lugares (mevzii sağanak yağışlı). I fue este modo. La noche mos echimos serka de la Bulgaria en Kapıkule aryentro de los kamyones de transporto. I dospues ke mos echimos, una luvyo kon pedriskos (dolu), una furtuna ke estava espedasando los kuadros de las ventanas. I eskrivi al grupo de la organizasyon “Un tiyempo ermozo dospues de una luvya” (los fransezes dizen: “apres la plui le beau temps”. I fue este modo. A la demanyana mos espertimos kon los pasharikos ke mos estavan kantando i mos estavan dando la novedad del tiempo maraviyozo.
En el empesijo de este evenimyento estavamos dezesperados porke el mizmo diya era la fiesta de las madres (anneler günü) i avia dos bodas en el Neve Shalom; komo esto no mos abastava, una partida de muestros mushteris se fueron a fiestar los sinkuentas anyos de una de sus amigas. El Alef organizo un brunch komo kada anyo kon tresyentas personas.
Me disheron “si keres, trokaremos la data para azer dos semanas dospues o en septiembre”. Les dishe no porke no vamos a topar la mizma enerjia otro tyempo. Kada koza en su tyempo.
En primero el Dyo mos ayudo i dospues el prezidente Ibrahimzadeh kon siertos amigos de la administrasyon. I dospues siertos sponsores mos ayudaron. I dospues en primero kon los posteres, la djente se enteresaron para vinir. I fuimos muy kontentes de ver tanta djente enteresada.
Teniyamos un problem. En el segundo balkon, kon las almenaras no s’estava viendo la shena. I a las una de la demanyana, un loko kon un vinch reusho a alevantar l’almenara de unos kuantos metros. I estuvo maraviya. Disheron ke deviyamos de azer eskalones (basamak) para ke se vea mijor. I reusheron a azerlo.
Vos avli de la luvya de la noche. Estava seguro ke el tiempo no mos iva azer shaka. Ma mos izo i malorozamente tuvimos una medya ora de luvya ke mos demoralizo un poko. Munchas grasias a Vivet ke era la patrona del pranso: brazero (mangal) i ligado (ciğer) frito ala Edirneli, ke estava muy kalma. Empeso a distribuir i repartir las salsichas (sucuk) i las keftes para ke la djente kede mas kalma.
En kada okazyon no es muy fasil ke un ministro sea prezente. Malgrado ke Edirne no tyene un aeroporto, el ministro responsavle de las fondasyones vino al konserto. Esto fue una onor para mozotros. Kuatro parlamentaryos de diferentes partidos estavan prontos en este diya. A la fin, mas de kuatroshentas i sinkuenta personas vinieron a oyir el famozo kontrtenor David D’eor.
La semana ke viene vos va kontar otras kozas sovre este diya si las otras kolonistas de la pajina de judeo-espanyol no lo kontan. Ya se ke Şeli i Dora estavan aya i esto siguro ke van a eskrivir sus sentimyentos sovre este diya.
