La semana pasada vos avli sovre mi viaje en Fransia, los dos primeros evenimientos ke toparon lugar la primera noche del Festival de la Kultura Djudia i vos eskrivi sovre las ekspozisyones de livros ke van a topar lugar durante esta aktividad. Me dieron un livro de mas de syen ojas ande fue posivle de topar mas de sinkuenta aktividades. Ke rikeza. Ay un alay de konsyertos i puedesh topar todo modo de muzika. Lunes el 26 Junio es posivle de partisipar al konsyerto de “The Hazelnuts”; tres mujeres Israelyanas ke kantan komo una boz o un enstrumento. Shira Carmel, Yifeat Ziv, Anat Moshkovski, las tres kantaderas kantan los kantes de los anyos 30 a los anyos 50 de la muzika amerikana. Kuatro muzisyenes van akompanyar las kantaderas. El 22, dia de Djueves, Arielle Dombasle va kantar egzempios de la muzika Cubana. “Amor amor”, ”Besame Muncho”, “Quizas quizas” van a ser unas kuantas kantikas de este konsyerto. El mizmo dia va ser dedikado el Premio Korman (por su servisio a la Kultura Yiddish) a la Sinyora Annick Prime-Margules. I dospues va tener lugar el konsyerto de Bielka ke kanta en diferentes linguas i en Yiddish. El 21, mierkoles, Gili Yalo, Israelyano orijinaryo de Etyopya va tener la okazyon de kantar en el Museo de arte i kultura Djudia. El 21 del mez de Junio, es muy emportante para los fransezes porke es el dia el mas largo del anyo i es nombrado “el dia de la muzika” i solo en Paris es posivle de partisipar a munchos konsiertos ke se realizan en las kayes i no se paga paras para estos konsyertos. Lunes tuvo lugar el konsyerto de Melodias Ebraikas realizado por Sarah Iancu (viyolonsel) i David Bismuth (piano). En el konsyerto tuvo lugar kantes liturjikos, kantes hassidik, yiddish i judeo-espanyol. Kreo ke fue un konsyerto muy enteresante. Dia de alhad avia dos konsyertos. El primer del muzisyen Dani Dorchin i el segundo del grupo “Pipaz” ke kantan muzika soul i funk, i son renomados en Fransia. El mizmo dia avia un dia muzikal kon mueve korales diferentes. Un dia ke se realizo entre las una del medyo dia fin a las 18.00. Korales kantando en ebreo, yiddish, judeo-espanyol, fransez i otras linguas. En la prezentasyon de este evenimyento esta eskrito si no partisipatesh a un Enkuentro de las Korales no konosesh el Festival de la Kultura Djudia. La semana pasada el 14, dia de myerkoles avia el konsyerto de Medz Bazar ke es un grupo de muzisyenes ke kantan los kantes de las Diasporas del Mundo Otomano. El grupo es formado de muzisyenes Ermenis i Turkos. Reelmente devia de ser muy enteresante de sintirlos en la shena. Es Ola Bilinska ke dyo un konsyerto de kantes Yiddish martes el 13. Kreo ke izo un grande esforso para aparejar un konsyerto ke kontiene solo kantes en yiddish. El grupo “Tram des Balkans” ke kontyene un akordeonisto i uno ke djuga la klarinet kantan kantes de los Balkanes. Ya konosesh a Bregovich, no puedesh estar asentados kuando esta en la shena i kreo ke fue la mizma koza kon este projekto ke se yamava “Kobiz Project”. Para eskapar los konsyertos vos va mensyonar el konsyerto de Esther Bejerano aedada de 93 anyos i ke kanta kon el grupo Microphone Mafia. Nasida en 1924, ija de un hazan, fue deportada a Auschwitz i salvo su vida porke era muzisyena. Kanta kon un grupo italyano-turko ke son muzisyenes de rap. Kantan kantes del Getto, kantes de la rezistensya Djudia, kantes de Brecht, kantes anti militaristas i kantes anti fashistas. Esther kanta, Esther rappa (rap müziğini seslendirir), Esther tiene 93 anyos i su vida delantre de eya. Reelmente vash a ser emosyonados mizmo en meldando estos biervos. Kuando va eskapar mi artikolo el primer echo va ser de bushkar en el youtube si egzisten los kantes de Esther…
Esta semana devo de dar haber ke la komemorasyon i el meldado del Sinyor Nesim Benbanaste va tener lugar el 6 de Julio a las 12.00 en el Templo de Neve Şalom. Los ke tyenen una sierta edad konosyeron al Sinyor Benbanaste porke era profesor en la eskola Djudia. I otros lo konosen por ke eskrivyo un livro sovre la Prensa Djudia en el Imperio Otomano i la Turkiya. I siertos lo konosen porke el fue el primer para dar la idea de la Selebrasyon de los kinyentos anyos de la egzistensya de los Djudios Sefaradis en el Imperio Otomano. Malorozamente no tuvo la posibilidad de ver las Selebrasyones i mos desho la vida ventisinko anyos antes. Es su ermano Danyel Benbanaste ke mos dyo haber de esta komemorasyon i meldado.
