El 30 del mez de junio la famoza mujer, avokata, mujer de politika ke fue prezidente del Konsilyo Evropeo i ministra de sanedad de Fransia, Simone Veil, mos desho la vida. Eya nasyo en Fransia i bivio en Nice. En el empesijo de la gerra toda la famiya - eran 6 ermanos - se fueron a Montpellier al lado de un ermano de sus padre. I kuando tornaron a Nice toda la famiya fueron arrestados i embiyados a diferentes kampos. Simone, su madre i una ermana fueron deportados a Auschwitz. A la fin de la gerra solo kuatro de los ermanos reusheron a kedar en vida. Simone tuvo mazal de kedar biva dospues ke bivio en los kampos. Eya era una mujer muy emportante para los Djudios Fransezes, para las mujeres fransezes. Eya djugo un rolo emportante en la politika de la Fransia.
Mi madre mas manseva de dos anyos ke Simon Veil estava en Paris, en Fransia en la mizma epoka. I tuvo mazal de kedar en vida. Elvir Ventura Profetta era la ija de Salamon Silven Profetta nasido en Hasköy, ijo de Avram Profetta ke era un buen shastre i ke alkilava vestimientas komo el Horozlu de muestra epoka i mi granpapa me kontava ke el mizmo smokin se lo vistian diya de shabat al muerte kristiano i el diya de alhad al novyo djudyo. No se si era la mizma koza en Horozlu? Kuando me kazi, no era mas la moda de alkilar bonjures i chapeos ma tuve la oportunidad de vistirme estos vistidos en el empesijo de los 70 por las bodas de mis primos i de mi ermana. Dospues todo troko i empesimos a vistir los mizmos vistidos todos lo ke estavamos en el kortej. Mi granpapa era un Turkofil (le plaziya muncho el turko, las komidas turkas, la muzika turka - en su manyetofon le plazia sintir las kantikas de Zeki Müren en los 33). Lo ke no le plazyo era el Askerlik. Era tiktiki i anyos i panyos komyo solo pan, sal i pimyenta fina ke se izo hazino. I dos vezes se fuyo del Askerlik. Lo apanyaron la primera vez. Ma si lo apanyavan la segunda vez los mandavan a Zonguldak ande empesaron a ekskavar las minas de karvon (kömür) i el tomo el primer vapor para irse a Marsilya (komo es la kantika... no servia l’Askerlik...). Nasido en 1898 Salamon Profetta se enstalo a Paris kuando tenia 20-22 anyos. Ya savesh la famiya Palachi ke es muy famoza en İzmir. Kreo ke mi granmama Sara Palachi Profetta es la ija de una de estas famiyas. Su padre era haham, si demandavaz a mi granmama era el Hahambashi dalkavo de Brusa. Mi granmama Sara estudyo en la Aliansa i un anyo en el kolej Amerikano. Avlava muy bien en Fransez i se peleava kon el Inglez. En esta epoka reelmente toda la djente eran poliglotas. El ke se iva uno o dos anyos a una eskola se ambezava la lingua a la perfeksyon. Dospues de l’Alliansa mi padre se fue en primero a la Saint Benoit. Kuando tuvo un problem kon un profesor el dyo karar de trokar la eskola i se fue a la skola Italyana. Mi padre nasido en 1919, kreo ke no eskapo el Lise ma avlava i eskriviya en fransez i en Italyano a la perfeksyon i konosiya el Grego i el Espanyol (kale dizir Djudeo-Espanyol). Reelmente en esta epoka era un mirakolo de ambezarse linguas. I Ribi Yosef Palachi kon su mujer Boulissu dyeron karar de embiyarla a Paris al lado dela Tiya Lates. La konosi en los anyos sesenta kon noventa por syen de arterios kleros. Mos espantavamos kon mi ermana porke diziyamos ke era loka.
İ dos Turkanos se kazaron en Fransia en el anyo 1923 i Albert (Avram frankeado - mi tiyo) nasyo en el 1924 i Elvir Ventura mi madre en el 1929. Los ke nasyeron en Fransia eran Fransezes ma no sus paryentes. Kalia ke se izyeran iskat (vatandaşlıktan çıkarılma) de la nasyonalidad turka, ma no era fasil. Kon la segunda Gerra Mondial, Albert i Elvir, djudios Fransezes, del primero diya metyeron la estrea amariya ande estava eskrito “JUIF” en medio (los tengo guadrados estas dos estreyas ke fueron yevados por mi tiyo Albert i mi madre. La famiya Profetta morava en Paris en el dyezen Arondisment. I el grande malor vino al 11 en. Moravan en el 83 Rue du Faubourg du Temps. Eyos eran en el dyezen i enfrente era el onzen. Mazal. Una noche arekojeron serka todos los djudios del 11en. Dospues se fuyeron un poko por aki un poko por aya. Mi Granpapa era “furlama”. Se fue al Konsulato Turko para estampar los pasaportos i le disheron “Ande estavas fin a este tyempo?”. I el, kon los mokos enkolgados topo un falsifikator (sahtekar) ke le izo stampas falsas en los pasaportos. I paso todos los anyos de Gerra kon este pasaporto. Mi Granpapa no era patron de echo; el era reprezentante de siertos artikolos. I lavorava kon un Espanyol. Lavoro anyos kon el manto ensima i kuando la Gestapo vinia al magazen komo kliente le dizia “au revoir”. Mi tiyo reusho a irse a Marsiya ande la situasyon era mas mijor (Zone Libre). Mi granpapa topo un remedio para mi madre i el patron Espanyol lo ayudo i tres anyos se kedo en un monasteryo de las sores espanyoles ke tuve la okazyon de vijitar dyes anyos antes. Es mi mujer ke me disho ke deviamos de irmos aya. Era en Paris i mos fuimos. Malorozamente “La Mere Superior” ke estava en vida tenia syen i sinko anyos i no estava en situasyon de avlar.
A kualo sierve el Judeo-Espanyol? A salvar una vida. Mi granmama i mi granpapa avlavan solo en fransez. El Judeo-Espanyol era la lingua ke avlavan entre eyos para ke las kriaturas no entiendan lo ke se avla. Ma deve de ser entendiyan. I mi madre en poko tyempo reusho a avlar el Espanyol.
Estash viendo kualo es el destino? Simon i Elvire: dos fransezas ke tuvyeron un destino diferente en estos diyas de desgrasya.
Mi madre esta en vida; ke el Dyo le de salud. I para Simon “ke su alma repoze en Gan Eden.” Amen!
