Ansi enpesa la perasha Devarim, ke es el enpesijo de el sinken livro de la tora.
Estas son las palavras ke avlo Moshe a el puevlo de Israel. Son palavras de kastigeryo.
Moshe Rabenu en sus diyas de alkavo kastigo a el puevlo Djudyo, en la yanura de el Yarden. El les izo akodrar lo yerros ke izyeron entervalo de kuarenta anyos en el dizyerto. Los diyas ke vinyeron kontra El Kriyador. Ke disheron, mijor era de murir en Mistrayim ke de vinir a este dizyerto. Ke sirvyeron el idolo de Peor, ke disheron a Moshe Rabenu no ay simiteryos en Misrayim. Ke nos trushites por murir en el dizyerto. Voz keshatesh por la magna ke vos dyo El Kriyador por mantenervos. İzitesh el bezero de oro. Les aze akodrar Moshe Rabenu el yerro ke izyeron los eskulkadores de avlar mal por la tyera prometida. Moshe Rabenu todos estos kastigeryos los izo a el puevlo Djudyo sekretamente. No los kijo azer averguensarlos de la estima ke teniya verso el puevlo Djudyo. Ma despues vemos ke Moshe Rabenu klaramente les aze akodrar los yerros ke izyeron el puevlo entervalo de los kuarente anyos ke estuvyeron en el dizyerto. Dizen nuestros savyos ‘la persona ke aksepta i desha a su pekado, este pekado se le aze merito’. Moshe Rabenu ke konosiya muy bien a su puevlo, ya entendyo ke el puevlo akseptaron sus yerros dunke no aviya ningun danyo de akodrarselos klaramente ke todos los yerros se izyeron meritos. Moshe Rabenu ekspliko la Tora entera a el puevlo Djudyo malgrado ke ya aviyan sintido en el monte Sinay. Moshe Rabenu tuvo de menester de repetarla a los ke nasyeron en el dizyerto, a la jenerasyon nueva. La jenerasyon nueva no aviyan sintido en el monte de Sinay, de boka de sus jenitores. Malgrado ke la jenerasyon nueva teniya una grande fey i kreyansa Moshe Rabenu tuvo el menester de eksplikarles el mismo.
Moshe Rabenu disho a el puevlo Djudyo: “El Kriyador enkomendo i disho, basta agora ke estuvitesh munchas enkomendansas, ya resivitesh la Tora, ya fraguatesh el Tabernaklo, ya formatesh el Sanedrin, el Tribunal. Agora vos esta avriyendo el kamino de la tyera prometida”.
Moshe Rabenu eskojo i tomo el biervo DEVARİM por el enpesijo de la perasha, mismo biervo Devarim la sinyifikasyon es bizbas. Komo los bizbas nos dan miel ke es dulse, i la Tora nos adulsa a nozotros, i es vidas para nozotros, komo es dicho, “arvol de vida es a la ke la sostyenen, i todos ke sostyenen a la ley son orozos”.
