Anyos antes la Büyükada era el lugar el mas valorozo i sosyetik para los Djudios de Estanbol i tanbien para una grande partida de los Estanbullis a la oteur. Munchas personas muy rikos pasavan los kuatro mezes d’enverano en la Büyükada o en la isla de Burgaz. Las sezones no trokaron ma las eskolas trokaron sus kalendaryos i estan dando las vakansas por dos mezes i medyo i siertas eskolas para tres mezes. Si son buenas eskolas empesan una semana antes i eskapan una semana mas tadre. Vos puedo djurar ke en la Eskola de mi ijo – es una buena eskola porke es bastante kara - oy en diya es mas difisil de pueder pasar las fiestas es la Büyükada, i si tenesh kriaturas ke no eskaparon dainda el Liseo, es serka enposible. Las kriaturas de esta epoka lavoran mas seryozos en el liseo i en la universitad. Anyos antes la mas grande partida de los elevos ke estudyavan en la universitad Teknik de Estanbol la eskapavan en syete o ocho anyos al lugar de sinko anyos para ser enjenyor alto o superior (en turko lo yamamos – yüksek mühendis). Vos kero dizir mizmo los ke estan vinyendo a la Ada ke no vos pareska ke es por dos o dos mezes i medyo! Una grande partida pasaron el mez de junio en Çeşme o en Alaçatı, mizmo en Bodrum – kazal ande nasyo Abraham Galante, ombre ke eskrivyo toda su vida; ombre ke eskrivyo todo lo ke topo sovre muestra komunidad i dospues kijyeron vinir a la Ada. Reelmente no es muy fasil estos trokamyentos. En mi chikes kuando se iva a la kampanya bayram-seyran era la Ada, solo la Ada. No teniyan otro echo para ir a otros lugares kuando era diyas de fiestas. Ma para los mansevos de ir a İzmir es un djugo… i munchos mansevos mizmo de una sierta edad se estan indo kada semana a un kazal en el oksidente (batı) de muestro payis. En el empesijo es muy eglenceli. Ma dospues da savor de kalavasa.
Si avlamos de la keila de Büyükada; diez o kinze anyos antes estava yena. Era muy difisil de topar un lugar diyas de Shabat i era mas zor kuando fiestavamos Rosh Ashanah o Kipur.
Ma oy en diya no es la mizma koza, munchas personas estan en otros lugares i es may kolay de topar lugar en la keila de Büyükada. Para ser mas atraktivos los diridjentes desidaron de organizar un konsyerto i noche de alhad tuvimos la posibilidad de partisipar a un konsyerto en el kal. Dos mansevos de grande talento, Cenk Rofe i Edip Bahar kon una orkestra de kuatro personas mos kantaron mas de vente kantikas siertas en ebreo komo “Yerushalaim shel zahav”, “Hora”, siertas kantikas ke son kantes ke kantamos en la orasyon (dua) komo “Adon Olam”, “Leha Dodi”, “Yigdal”, “Mizmor ledavid” i kantes de los muzikales komo “Les Miserables”, “Kazablan”, “Salah Shabati”, “Fidler on the roof”. Eskaparon el konsyerto kon un potpouri (munchas partidas de diferentes kantes kantado uno detras del otro) ke la asistensya partisipo kantando en pyes (ayakta). En syertas kantikas vimos en la shena las “Estreyikas d’Estanbol” ke es un grupo de kriyaturas edukados por İzzet Bana. Reelmente İzzet tyene pasensya para edukar estas kriyaturas ke kedan dos o tres anyos en su grupo. Komo se engrandesen muy presto deve de topar muevas kriyaturas. Reelmente İzzet deve de ser apresiado (takdir edilmek).
Kero rengrasyar los diridjentes da la Keila de Büyükada i a los sponsores ke ayudaron para la realizasyon de este konsyerto. Keridos dirijentes oy tenesh muevos mansevos ke vos estan ayudando. Puedesh organizar mas munchas organizasyones komo konsyertos o konferensyas komo lo estash aziendo. I este modo, la keila va ser un lugar ande mas munchos yahides van a partisipar.
