Pasimos muevamente las fyestas Rosh-Ashana i Kipur.
Rosh-Ashana es un prinsipyo (başlangıç) de una anyada mueva ke kontyene muevos ideales, muevas reushidades, muevos problemes kon muevas solusyones, i lo mas emportante, muevas relasyones kon muevas amistades (dostluk). Kada prinsipyo es una esperansa. Ke seyga una anyada kon un avenir muevo i valorizaremos muestra vida verso los preseptos de muestro Dyo.
Rosh-Ashana es el empesijo del anyo, la kavesera (baş) del anyo muevo ke se fyesta en el mez de “Tishri” jeneralmente. Esta fyesta es una de las mas emportantes de los djudyos en el punto de vista de su senso i en el punto de arekojer toda la famiya en el entorno de una meza. Madres, padres, ijos, ijas, grandes, tiyos, primos i aliados (dost) ke estan solos.
Es uzansa de ir a las sinagogas para azer orasyones, para la yamada del arrepentimyento (pişmanlığa çağrı), i para sintir el “Shofar” ke es el simbolo de la esperansa de la anyada vinidera; ke seyga yena de salud, kalmo, parnasa tova i pas en el mundo entero.
Rosh-Ashana sinyifika para los djudyos “La Kreasyon del Mundo”. Esta fyesta es el dia del djuzgamyento (yargı). Rosh-Ashana es para mozotros la mirada a si mizmo (kendine bakış), pasar del ojo las kulpas ke izimos el anyo pasado, i el tyempo de azer planos para los trokamyentos ke vamos a akumplir en la anyada mueva.
Rosh-Ashana es una fyesta alegre entornados de muncha djente i munchas kumidas savrozas ke aparejan las mujeres kon muncha atansyon i kerensya.
Por egzempio, en las dos noches de Rosh-Ashana, kuando se vyene del kal a kaza; se dize el Kidush. En primero se kome el dulse de mansana kon miel endjuntos, lo ke sinyifika ke este anyo muevo va ser dulse del empesijo fina la fin, sin problemes, gerras u terrorizmo.
Para ke el anyo seyga yena de azlaha (bereket) se kome agranada (nar) ke es el simbolo de la abondansa (bolluk).
La prasa semboliza ke los enimigos ke keren muestra maldad (kötülük), ke se despareskan (yokolmak). La espinaka es el simbolo de lo ke dizimos por muestros inimigos; ke los ke keren muestra maldad ke se aleshen (uzaklaşmak) de mozotros.
La datile (hurma) ke se kome semboliza ke todas las negriruras ke tengan fin de agora endelantre.
La kalavasa es la sinyifikasyon de los zahutes (sevap) ke azemos.
El peshkado semboliza la azlaha, la abondansa (bereket) i el pujar. Ke muestros zahutes ke pujgan komo el peshkado.
Una de las uzansas emportantes es ke se kome la kavesa del peshkado o de la gayina; ke es la sinyifikasyon ke syempre estaremos a la kavesa de todo modo de akontesimyento en muestra vida.
Avlando de las uzansas me akodri de una tiya (zihrono livraha) ke mos kontava konsejas i evenementos i rekuerdos ke se aziyan en las fyestas.
Komo por egzempio; se tomava una kanata (sürahi) yena de agua, i se metiya delantre de la ventana afuera enriva de la garnitura (pervaz).
Esta kanata; noche entera tomava las luzes, las ermozuras, las buendades ke viniyan del Dyo; i al otro diya; toda la famiya deviya de lavarse la kara kon esta agua bendicha; yena de ermozuras; para ke el anyo entero seyga yeno de evenementos orozos, i sanedad.
El dyezen dia de arrepentimyento se termina kon el “Yom Kipur” ke es el dia grande de Taanit, no se lavora i dia entero es taanit i se orasyona en las sinagogas para deskulparmos de las faltas ke izimos. Kada uno i uno se aze un egzamen de konsensya (vicdan muhasebesi) ke es “Teshuva”. Teshuva en ebreo es el retorno atras (geriye dönme). Yom Kipur es alimpyarse de todos los pekados. Es la purifikasyon de la neshama (ruhun arınması). En este dia Santo solo las kulpas ke izimos al Dyo se pardonan.
Este anyo komo la sinagoga de Burgaz estuvo serrada, fyestimos kon mi famiya, las fyestas en Neve Shalom.
Neve Shalom es la sinagoga prensipala i la mas famoza de los djudyos de Turkiya. Se avyo en el anyo 1951 i es la sinagoga la mas mueva i la mas grande de Estambol. Todas las bodas ke se realizan aki, tyenen una ermozura espesyal.
Una keila es alegre kon la djente ke asiste a las orasyones, a las fyestas i a todo modo de evenemento. Despues de este mez sakro yeno de fyestas, una de detras de otra, vamos a tener un invyerno yelado, kon tyempos ariskuros.
Esta sezon mos da la posibilidad del desvelopamyento personal, seyga en indo a los teatros, filmos, ekspozisyones, seyga en indo a los konsertos, a diferentes kursos de lingua u de pintura para pasar el tyempo en yeno.
El Dyo ke mos ayege para kada anyo, kon sanedad i felisidad i ke mos guadre de las kozas ke no mos puedemos guadrar. Pujados i non aminguados…
