Un diya de fin de semana uvo una reunion ande partisiparon los miembros del Şalom ke toman parte en la seksyon del judeo-espanyol. Siertos eskriven kada semana, siertos kada dos semanas, i siertos una vez al mez. I deviamos de organizar komo se va publikar esta oja kon los eskrivanos ke se topan en muestro Sentro. Estamos muy kontentes de los kolaboradores ke biven en diferentes payizes i ke mos ayudan kon sus artikolos ke son publikados en “El Amaneser”. Ma muestra preferensya es ke el Şalom apareska kon los artikolos de los miembros de muestro Sentro. Esto no kijo dizir ke una persona ke bive en un otro payis no puede embiyar un artikolo. Va ser un plazer para mozotros de publikar su artikolo. Ma no kada semana.
En esta reunion en azyendo shakas disheron si kalia tratar sovre Weinstein dospues de Michael Rosbas ke gano el Premio Nobel de Medisina.
Sesh anyos antes, un skandalo topo lugar en un otel de sinko estreyas en Nueva York. El kandidato el mas fuerte para ser Prezidente de la Republika en Fransia, el sinyor Dominique Strauss-Kahn fue el eroe de un skandalo en un otel ande atako una servidera. I esto fue reelmente un evenimyento muy emportante ke dyo fin a la kariera politika de Strauss-Kahn ke fue el Prezidente de la IMF (International Monetary Fund - El Fondo Internasyonal de Moneda). Ya se aviya eskrito en los diaryos ke en las enkuestas (anketler) estava 20 puntos delantre de Sarkozy i para defenderse disho ke esto todo era un komplo. No savemos la realidad. Ma savemos ke un akto asemejante troko el futuro de Strauss-Kahn i de la Fransia.
Esto no kijo dizir ke devemos de tomar una lisyon de este akto. Estas semanas dalkavo estamos oyendo un otro skandalo kon el patron de “Weinstein Company” en Hollywood, el sinyor Harvey Weinstein, ke poseda 800 milyones de dolares i 81 premios de Oscar. Ke fama! Ma su fama es mas popular kon sus abusos (tacizler) de las aktrisas. El sinyor Weinstein, estos trenta anyos dalkavo, al lado de la realizasyon de sus filmos paso su tyempo molestando las aktrisas i si no kijeron ser su havera, preferaron de ver la fin de sus karyera artistika. Savemos esto todo kon dos artikolos ke toparon lugar en el diaryo “The New York Times” i en la revista “The New Yorker”. Esto fue eskrito kon la konfesyon de tredje mujeres. Kuando estava eskrivyendo mi artikolo este shifro enalteso a trenta i sinko. No konosko al sinyor Harvey ni a su ermano Bob. Ma agora savemos ke avia un pleto entre los dos ermanos i ke kada uno keria meter su fuersa en medio. I Harvey fue metido a la puerta de su kompanyiya (şirket).
Dospues de esto todo, su mujer dyo fin a este kazamyento. I Harvey kijo suisidarse. En el empesijo vamos a ver la gerra entre los dos ermanos i dospues vamos a ver si Bob va tener un sukseso komo su ermano Harvey. Es siguro ke Harvey atako munchas mujeres i si no topo kara dyo fin a sus karyeras artistikas. Ma i en este kavzo estamos viendo la gerra de los poderes. Ma vamos a ver si va ser i la gerra ke las kapachidades!
