La fama de Avraam se iva engrandesyendo i espandyendose por todo el mundo. I todos lo amavan i lo respektavan de ver su prosperasyon en todo lo ke aziya, i los akontesimyentos milagoros ke le akontesiyan uno detras de otro.
El Kriyador kijo dar a mostrar a el mundo ke todo esto no era en baldez. Ke Avraam Avinu meresiya ke El kriyador le izyera una koza enteramente kontra la natura de kualunke persona por ke vyeran el mundo komo Avraam en tal de azer el komando del Kriyador abandona enteramente su natura.
Ansi le dize El Kriyador ke tome a su ijo regalado Yitshak i ke se lo yeve a Yerushalayim, a el lugar nombrado Moriya i ke lo aga Ola Korban delantre todo el mundo sovre uno de los montes de ayi ke le va amostrar.
Avraam sintyendo este komando de Dyos, sin ezitasyon toma a su ijo Yitshak i las kozas menesterozas para un korban, el kuchiyo, el fuego i la lenya. I se va a este monte.
El kamino era leshos de Beer Sheva a Yerushalayim. En el treser diya arivo ayi.
Avraam se mete a la ovra, fragua una ara (mizbeah) i la apareja; poza la lenya, ata a su ijo Yitshak, toma el kuchiyo para degoyarlo por korban. Yitshak a edad de 37 anyos no refuzo de desharse degoyar.
El Kriyador ke le enkomendo a Avraam ke izyera este akto por mostrar a el mundo su valor, i no penso nunka ke degoye verdadmente Avraam a su ijo, mando a su anjel, i le defendyo de degoyar a su ijo, ni de azerle ninguna koza en onor del Kriyador.
Entre myentes ve Avraam un karnero. Alora va Avraam Avinu, i toma al karnero, i lo aze sakrifisyo en esta ora a nombre del Kriyador en lugar de Yitshak.
