Mizmo si no es muy fasil de vender siertos livros muy partikular, ke enteresa muy poka djente, devemos de realizarlos por sus kontenidos rikos. Es por esta razon ke los editores de vez en kuando preferan ke el livro sea eskrito en dos linguas - el inglez es la grande preferensya para la primera - i este modo ay munchos mas lektores para pueder meldarlos.
Es ke un amigo ke se enteresa en la fotografia i ke tyene un grupo ke se yama Focus, despues de travar tantas fotografiyas i vijitar los kuartieres ande bivyeron i mizmo biven oy en diya los djudios dyo karar para formar un livro en turko i en inglez yeno de fotografiyas travadas por el mizmo i los miembros del grupo Focus.
Rubi Asa ke es el ke arekojo i eskrivyo los artikolos, mos esta prezentando siertos kuartieres de Estanbol ande bivyeron los Djudios komo Hasköy, Balat, Galata, Yel değirmeni-Kadıköy i Kuzguncuk. Oy en diya no ay mas personas ke biven en estos kuartieres. Puedeser unas kuantas famiyas en Galata. Ma en estos kuartieres kuando kaminash en las kayes ya puedesh entender el pasado djudio. En Galata, ande moraron bastantes Djudios entre los anyos 1910 asta los 1970, en kada kaye i en kada apartamento es posivle topar trasas djudias. I si tenesh la posibilidad de kaminar kon un savyo ke bivyo munchos anyos en La Kula reelmente es mas enteresante porke vash a tener la posibilidad de imajinar lo ke azian muestros avuelos en estas kayes. Los ke vendiyan pishkados, turshis, zarzavates i todo modo de kozas…
Es djusto ke estos kazales tienen una grande emportansa en la istoria de los Djudios Estanbullis. Rubi mizmo mos esta azyendo konoser la istorya de Ortaköy ke fue un tyempo un lugar emportante ma despues pyedro esta emportansa. Anyos despues, de muevo empeso a ser frekuentado por las famiyas djudias. Oy en diya mizmo la Sinagoga Etz-aHaim es una de las mas frekuentadas de Estanbol i kada diya los djudios se van a la demanyana komo a la tadre a este templo. A parte de Ortaköy, mizmo las islas tyenen una emportansa en la vida Djudia. Es vedra ke son frekuentadas lo mas muncho en enverano ma anyos antes i mizmo oy en diya, ay famiyas ke estan preferando de bivir en la Büyükada mizmo en invyerno.
La traduksyon en ingles es el lavoro de muestra Karen Şarhon.
Espero ke este livro va tener el entereso ke merese. Felisitamos a muestro amigo Rubi Asa i sus amigos ke le ayudaron por sus esforsos.
