Yaakov mando mesajeros onde Esav su ermano kon unas palavras muy tyernas, dandole a saver las fuertes fatigas ke tuvo en sus 20 anyos de sirvisyo onde Lavan, i ke agora lo engrasyo El Kriyador i es patron de kualker koza. I le roga ke se olvide todo lo pasado i ke seya su amigo por endelantre i komo estas palavras ke azen ablandar el korason mas duro.
Los mesajeros izyeron el komando de Yaakov i fueron a punto onde Esav i le disheron las palavras de Yaakov. Esav no kijo ni menos sintir sus palavras. I se ensenyo mas muncho kon su ermano.
Sintyendo Yaakov esto, se apronto para todo. En primero rogo al Dyo ke este en su ayuda sigun se lo prometyo, i ke lo eskape de Esav su ermano. I despues divizo todo su fonsado en dos partes. I aparejo un prezente grande de ovejas i kuatropeas por darle a su ermano. I lo reglo de buena manera a ke se la inchera el ojo de Esav. I a la medya noche, izo pasar todo su fonsado a la otra parte del rio Yabok i a la manyana kontinuo su kamino serka el medyo diya. Ve Yaakov de enfrente a Esav kon su konpanya ke vyenen a su enkontro alora se apresuro Yaakov i paso delantre todo su fonsado i se omiyo i se enkorvo delantre su ermano kon muncho respekto.
Entonses se troko la idea de Esav i se ablando su korason. I koryo al enkontro de Yaakov, i lo abraso, i lo bezo, i yoraron todos de alegriya i enprezento Yaakov todo akel dono ke aparejo por el, i a toda su konpanya les dyo munchos regalos i plata i oro. En akel mismo diya, torno Esav a su kamino para la tyerra de Kenaan i arivo a el lugar nombrado Sukot ke es serka del yarden i fraguo ayi kaza para morar, i lugares para su ganado.
