Dospues de unos kuantos anyos d’eksperyensya, este anyo desidimos de organizar el diya del Judeo-Espanyol el 18 del mez de febrero. Ande lo vamos organizar? En la eskola Djudia. Komo savemos ke ay problemes para parkar las arabas, tratimos kon un otopark i un midibüs va azer tornos entre la eskola i el otopark. Mizmo tratimos kon el otopark.
Dospues de las aktividades del anyo pasado, los mas mansevos disheron ke devemos azer siertas aktividades mas interaktivas ande mas muncha djente van a partisipar a las aktividades. I kreo ke vamos a realizar esto. Mas muncha muzika, mas muncho divertimyento (eğlence), mas muncha partisipasyon de las kreaturas; realizasyon de siertas kompetisyones ande van a partisipar inyetas i inyetos kon sus nonas i nonos. Kreo ke va ser muy atraktivo (çekici).
Ya savemos ke el 16 i el 17 desembre vamos a tener en el Sentro de Arte Fulya, ke es un salon de la Munisipalidad de Beşiktaş, la representasyon de la piyesa “Kula 930”, esta piyesa ke fue djugada en el anyo 1977 por el Dostluk Yurdu. I kreo ke son los mizmos artistas/tos ke van a tomar la shena i esta vez. 40 anyos antes, 40 anyos dospues. Kreo ke va ser un grande evenimyento ma no va ser muy kolay para los ke van a estar en la shena, porke ya no son mas muy mansevos.
Reelmente tuvyeron un grande koraje en organizando este evenimyento. I mos esta dando fuersa para muestro diya del Ladino. Si ay mas de mil i kinyentas personas ke van a vinir para mirar esta piesa de teatro (oyun) kreo ke el auditorium de la eskola no va ser un lugar bastante ancho para rekojer tanta djente.
Vos kero akodrar ke este anyo va ser solo un diya. Diya de alhad kon la komida de midi. Va ser un pranso no muy kaldudo ma mos va azer akodrar las komidas de muestras madres, las komidas de las mezas sefaradis.
Vamos a pensar komo puedemos azer la publisidad (reklam) de este diya durante la reprezentasion de “Kula 930”.
Vos estamos asperando el 18 de Febrero…
