Savemos ke en el kalendaryo Ebraiko tenemos diferentes anyadas muevas; para las plantas i arvoles, para la Tora, para las sezones … En el kalendaryo Kristyano ke es el kalendaryo el mas emportante oy en diya porke todas las komunikasyones en el mundo se azen sovre estas datas, i mizmo los aviones son organizados kon este kalendaryo.
Deke este kalendaryo es tan emportante? No es porke tenemos un diya de vakansas el primer diya del anyo. Ma es una data emportante porke las kompanyias komersyales azen todos sus kuentos de un anyo al otro. I las ganansyas o, el Dyo ke no mos trayga, las piedritas de las kompanyias son deklaradas en estos diyas. Todos tenemos muevos planes kon el empesijo de la mueva anyada. Kuando es la fin del anyo, munchas personas mizmo si no son kristyanos keren pasar una nochada en egleneandosen. De vez en kuando esto es una obligasyon para siertas personas i no toman dingun plazer en esta noche forsada. Munchos anyos tuvimos problemes en muestra komunidad para fiestar estas noches en los klobes djudios si es una noche de shabat o si es una noche partikular. Ma kreo ke este anyo no se va bivir una koza asemejante porke lo vamos a fiestar alhad la noche (pazar akşamı).
Mizmo en la Komunidad Djudia, todas las ovras azen sus kuentos sovre este kalendaryo i azemos todos los kuentos de enero en enero (ocak ayından ocak ayına). La kizba ke se arekoje para los gastes de muestra komunidad se empesa a arekojer en el empesijo del anyo ekonomiko (mali). I asta la fin del anyo. Oy en diya se avla de una Aliya emportante. Malgrado esto los ke lavoran por la Kisba estan reushendo a arekojer el montante ke nesesita la komunidad. Esto no kijo dizir ke es un montante sufiziente ma a lo manko afronta (karşılamak) los gastes.
Ay anyos ke muestro buto es de tener siertos imobles ande la Komunidad va tener la posibilidad de alkilar (kiralamak) i tener un revenido bastante para los gastes de muestra Komunidad.
En eskrivyendo este artikolo vos kero dizir ke el 20 de este mez vamos a tener la avyertura de una mueva ekspozisyon en la Sinagoga de Edirne sovre los Templos de Estanbol.
Kero partajar una otra koza
sovre la aktivitad del Şalom, los 70 anyos del Şalom. Vamos a tener una selebrasyon en el Sentro de Arte Fulya, ande vamos a tener el plazer de sintir la konferensya del jornalisto Ertuğrul Özkök, el konsyerto del famozo kantador Dany Brillant, un filmo kurto sovre el Şalom i una ekspozisyon de los pintores/ras i artistos de fotografia ke el Şalom va vender sus ovras a los enteresados. No se si es dainda posivle de topar envitasyones para este evenimyento ma puedesh telefonar i demandar si es posivle de topar un lugar para esta nochada ke va ser una maraviya.
