Bivimos en un payis ande puedesh bivir todo modo de ekstremizmo. Unos kuantos diyas antes, mizmo oy en diya la Turkiya se esta estruyendo porke el Prezidente Trump deklaro ke van achetar ke Yerushalayim va ser la kapitala del estado Djudyo: Israel. I despues los Estados Unidos va transportar el embashada de Tel Aviv a Yerushalayim. No kreo ke va ser el uniko pais ke dara esta desizion. Vimos ke la Republika Tcheka va transportar antes de los Amerikanos su embashada. Kualo afito despues de la deklarasyon del Prezidente Trump? Kreo ke estas manifestasyones van a kontinuar unas kuantas semanas. Savemos ke el Prezidente de la Republika Turka esta organizando una konferensya kon los payizes muzulmanos para dar una desizion. Kreo ke van a dar karar de dezaprovar (kınamak) esta desizion. Ma los Estados Unidos na va trokar su desizion. Savemos ke Trump, antes su deklarasyon tomo idea del Prezidente Ejipsyano Sisi i de los reyes de la Saudi Arabia i del Jordano. No savemos lo ke avlaron ma no reusheron a akedar (durdurmak) el Prezidente Trump.
Una semana despues, diya de Lunes vimos en la media, ke el Prezidente de la Republika, Erdoğan i el Primer Ministro, Yıldırım izyeron deklarasyones para felisitar la fiesta de Hanuka de los Djudios Turkanos i los esta nominando komo una partida inseparable del puevlo Turko. Devemos de estar kontestes de esta deklarasyon porke komo lo keremos el Prezidente esta azyendo la diferensya ke keremos entre los Djudios ke son Turkos kon los Israelyanos o el Estado de Israel mizmo si esta eksesivo (aşırı) kontra esta desizion.
Diya de Shabat era la fiesta del Şalom en el Neve Şalom. Komo estavamos fyestando los setenta anyos de la fondasyon de muestro semanaryo, bivimos un diya de fiesta en la Sinagoga. Normalmente en esta sinagoga diya de Shabat tenemos entre trenta i kuarenta yahides ke vyenen kada semana. Ma este shabat los ke estavan en la sinagoga bivyeron un diya orozo komo un diya ke se fyesta una bar mizva. İvo Molinas, el administrator de la publikasyon (yayın yönetmeni) fue la kriyatura ke izo su bar mitzva i kon su diskorso sovre la Perasha de la semana fue la estrea del diya. En este diya tuvimos la posibilidad de komemorar los sinyores Avram Leyon, Salamon Bicerano, Eli Perahya, İzidor Barouh, Robert Alfandari i Vitali Sadacca, i las sinyoras Leyla İpeker, Lizet Cur, Gila Kohen, Beki Bardavid, Beki L. Behar, Mary Asayas i Klara Perahya ke mos desharon la vida estos 32 anyos dalkavo. Por esta okazyon munchos pintores/as mos izyeron siertas ovras de arte ke van a ser ofertas a los ke ayudaron al Şalom para la realizasyon de este diya. De otra parte estamos ekspozando serka de 40 fotografias, ovras de diferentes artistos de fotografia. Kreo ke djueves vamos a bivir una nochada eksepsyonal kon el konsyerto del famozo kantor Djudio Fransez, Dany Brillant...
