Los Ejipsyanos, vyendo ke kon todo ke estan afriyendo a el puevlo Djudyo, kon esta fuerte i dura ovra no estan puedyendo valir kon eyos. Kuanto mas los afriyiyan i apezgavan sus sirvimyentos en los kanpos i en las kazas, mas se avian muchiguando i enfortesyendo.
Le dyeron avizo al Rey por ke de una idea ke manera valir kon este puevlo i atemarlo enteramente. Despues de azer un konsilyo sovre este echo, desidaron entre eyos de azer matar todos los ijos ke nasen de este puevlo i al punto mando a yamar Paro a los komadres kaporales ke resivian a las parideras Djudiyas ke se nombravan Shifra i Pua. I les enkomendo ke kuando resiven a los nasidos de los Djudyos, si ven ke es ijo, ke lo maten sekretamente i si es ija, ke la deshen biva. I kon este envento pensaron de atemar a el puevlo Djudyo.
Pero, El Kriyador no estuvo de akordo kon este mal pensamyento de los Ejipsyanos i las dichas komadres espantandosen del Dyo Santo, no dyeron ninguna enportansa a la enkomendansa de Paro i arebivian a los ijos.
Paro no se deskorajo por esto de su negro penseryo, i sovre el konsejo de Bilam i del resto de sus savyos se permetyo de enkomendar klaramente a su puevlo ke todo ijo ke les nase a los Djudyos ke lo echen al rio i solo a las ijas ke las deshen bivas.
Estonses uvo una diferensya de ideas entre el puevlo Djudyo. Uvo entre eyos ke se apartaron de sus mujeres por no ser kavzantes de matarlas a los ijos ke les van a naser. Pero uvo tanbien una enkomendansa muy sakra meldamos en la perasha de esta semana: “Vas a ser prinizmo kon El Kriyador”.
Kere dizir la kreyensia, i la esperansa, solamente vas a tener en El Kriyador. El te va salvar, el te va ayudar en todo lo ke esperas i lo ke dezeyas.
La manera ke estas avlando deves de pensar. No es del todo derecho de pensar una manera i avlar otra manera. El korason i la boka deven de estar lo mismo.
