La semana pasada vos konti ke a la fin de la semana mos deviamos de ir a viyaje porke era las vakansas de medio anyo de las eskolas. I vinimos a Berlin. Mos estamos kedando en un otel luksuozo en la partida ke la nomavamos este o oryente (doğu), i dospues de 3 diyas vos puedo dizir ke la mas grande partida ke vijitimos se topava en esta parte de la sivdad. Antes de viyajar me fui a un magazen de livros i pishin tomi un livro sovre esta sivdad. Es vedra ke no topi un livro de la seria ke keria ma kreia ke kada livro es bastante para pueder viyajar tres/kuatro diyas. El livro ke merki estava barato ma no me sirvyo porke no estava eksplikando bueno. Puedeser kaliya estudyar i pasar bastante tyempo para pueder entender lo ke se estava kontando. Kreo ke meldi en el livro ke estava dizyendo ke la superfisia (yüzölçümü) de la sivdad de Berlin era 8 vezes mas grande ke de Paris. Ouay! Vijiti trenta vezes la sivdad de Paris empesando de mi chikes. Se emplea el metro a la perfeksyon, ma vos djuro ke no konosko ni la meatad de esta sivdad. Si Berlin es ocho vezes mas grande, mos vamos a pedrer en esta sivdad. Viernes a la tadre kuando vinimos al otel pishin arekojimos las broshures turistikas i karishtereando vide un tur de tres oras i medya ke se estava realizando en kaminando - Zero grado de kayentor, sin luvya, i de vez en kuando la inyeve estava sarpikando - i azyendo vijitar todos los lugares ke aviyamos markado en un papel. En el empesijo mi mujer i mi ijo no kijieron. Les dishe dospues de este tur va azer todo lo ke keresh. I a la demanyana solo en una kompanyia avia serka de sinkuenta personas para este tur: “Deskuvrir Berlin”. I reelmente kon las eksplikasyones de la gia (kadın rehber) en tres oras i medya izimos el torno de la sivdad (partida turistika). I muertos de friyo i kanserya topimos refujyo en un restoran ke estava kaynte.
La noche ke vinimos, las kayes estavan yenas de djentorya; ma dospues dingunos en las kayes. En un restoran fransez - rekomendado por el konsierj del otel - ke mos fuimos estava reelmente yeno a patladear. Asperimos para asentarmos mizmo si era el segundo servis. El restoran era mizmo rekomendado por el Michelin. Ma el rezultado de las komidas no fue de la mizma manera. No fuimos muy kontentes de este restoran.
Los dos diyas sigientes (takip eden) en kada lugar ke mos estavamos indo, estavamos saliendo a las mizmas kalejas i los mizmos edifisyos. La kula de televizyon ke se topa en Alexanderplatz. I de kada lugar se estava vyendo la Kula. De la otra parte se estava vyendo el tejado de la Dome de Berlin (La Grande Iglesia). I entendimos ke Berlin puedeser es muy grande ma los sitos turistikos se topan en el mizmo lugar uno al lado del otro.
Otra koza ke devo de kontar es el monumento ke fue fraguado en la memoria de sesh miliones de djudios ke fueron matados por el rejim Nazisto. El monumento es formado kon miles de piedras bashas (sesenta santimos) i altas (kuatro metros). Entre estas piedras ke no posedan dingun nombre, ni dinguna data son alinyadas... I entre estos rangos de piedras se topa kaminos ke la mas grande partida no son derechos. Todas las piedras son de kolor griza. I al lado se topa un memorium ke no puidimos vijitar diya de lunes porke estava serrado. Vamos a topar la posibilidad martes. En Berlin se topa un segundo muzeo Djudio, reelmente muy diferente de todos los muzes djudios ke topi la okazyon de vijitar.
El Muzeo fue realizado por el arshitekto Amerikano Daniel Libeskind. I fue terminado en el anyo 1998. Nada no es derecho en esta arkitektura komo la vida de los Djudios Almanes. Los kaminos, el materyal empleado, las kolores de las piedras, la luz ke se ve de siertos lugares, mizmo miles de karas en fierro, enstalasyon del famozo artisto israelyano Menashe Kadishman. Reelmente esta sala estava dando emosyon a todos los vijitadores.
Mizmo si el tyempo esta bastante yelado, la okazyon de vijitar esta sivdad fue un dover i un plazer.
