Yitro, suegro de Moshe Rabenu, tuvyendo avizo de todo lo ke paso dizde ke salyo el puevlo judyo del Ejipto, i todos los milagros ke izo el Kriyador a los judyos por mano de Moshe Rabenu, tomo a Tsipora, su ija, mujer de Moshe Rabenu, i a sus dos ijos, Gershom i Eliezer, i se fue para el dizyerto, al monte de Horev por verlo a Moshe Rabenu, a alegrarsen kon el i saver todos los pasajes en detalyo.
Arivando al monte de Horev, mando avizarle a Moshe de su venida. Tuvyendo avizo Moshe Rabenu, de la vinida de su esfuegro, salyo al punto de refidim, a su enkuentro, el i todos los grandes personajes del puevlo judyo. Lo resivyeron kon muncho respekto i le izo las onores meresidas i le konto todos los pasajes en detalyo dizde el diya ke se espartyo de el fin este diya.
Yitro se alegro muncho de sintir todo esto i bendisho a el Kriyador, rekonosyendolo por Sinyor de todo el mundo i resivyo sovre si de kreer en el solamente i guadrar sus enkomendansas i kedo en el dizyerto kon Moshe Rabenu.
De todas las gloryas i milagros ke vido el puevlo judyo dizde ke empeso a ser favorizado del Kriyador la mas alta i enshalshada glorya fue la resividura de la Ley Santa en el monte de Sinay, MATAN TORO, la kual es un pasaje muy seryozo i muy enportante en la estorya del puevlo judyo.
Despues de un mez i medyo ke salyo el puevlo judyo del Ejipto en el primo diya de el mez de Sivan, partyeron de el lugar nombrado Refidim i arivaron a el dizyerto de Sinay i pozaron enfrente de el monte Sinay Ar Sinay. En este lugar, deklaro el Todo Poderozo a el puevlo judyo por su boka de su fidel sirvidor, Moshe Rabenu, “Vozotros vitesh muy byen”, dize el Kriyador, “lo ke ize a los Ejipsyanos i komo vos trushe asta aki kon muncha siguridad, komo sovre alas de agilas i agora si vozotros keresh ovedeser mis ordenes i konservar mi firmamyenta kon vozotros, de ser mi puevlo fidel, alora vozotros seresh konsiderados mi trezoro i una nasyon muy keridos, ma a kondisyon ke devesh de ser una nasyon de Koanim, servidores del Kriyador i un puevlo Santo. Sintyendo estas palavras el puevlo, de boka de Moshe Rabenu respondyeron, “Todo lo ke nos enkomenda el Kriyador vamos a ovedeser. NAASE VE NISHMA”.
