Alhad la tadre tuve la posibilidad de ver en el YouTube la seduta de serradura de la reunion ke se realizo en Madrid durante dos diyas para formar una Akademia Nasyonal del Judeo-Espanyol. Ya saviyamos poko tyempo antes ke la Real Akademia Espanyola estava lavorando para krear una Akademia Nasyonal del Ladino en Israel. Ma parese ke uvo siertos movimyentos, i siertos akademikos no tomaron lugar en esta evenimyento. El fondador de los Estudyos en Ladino en la Universidad Ebrea de Yerushalayim, el Profesor David Bunis no fue prezente en estos diyas ande se trato el futuro de muestra lingua.
Es puede ser djusto ke este dover fue dado a un paiz ke tiene todo modo de posibilidades – ma no vimos bastante fin agora – de punto finansial i akademiko.
Pensava ke los partisipantes ivan mensionar i ke puedeser lo izyeron mizmo si no topo lugar en las deklarasyones, la emportansa del Imperio Otomano i de estas tierras ande el Djudezmo topo la posibilidad de bivir i de desveloparse durante 525 anyos.
Oy en diya, el Sitio de Internet “Ladinokomunita” kreo ke es segido por munchas personas de los kuatro puntos del mundo mizmo si todos sus partisipantes no eskriven bastante. Reelmente Rachel Bortnick es una persona muy emportante en este kampo. En Fransia ay munchos akademikos i munchas personas ke lavoran sovre esta lingua.
Estanbol i İzmir, las dos sivdades ande moran serka de 17.000 almas djudias, los noventa i sesh por syen son sefaradis. Mizmo si oy en diya no emplean esta lingua, biven esta kultura. Es unos kuantos mezes antes ke se metyo en shena la piyesa de teatro “Kula ‘930” ande serka de kuarenta personas de una sierta aedad i mizmo mansevos i kreaturas tomaron rolo. I serka de tres mil personas vinieron a verla. Kreo ke es una kolektividad bastante nombroza. Espero si van a tener la posibilidad se van mizmo a ir a Israel ande van a tener la oportunidad de partajar sus esforsos.
Kon el Şalom, en primero aviamos desidado de eskrivir kon la ortografia turka. Por egzempyo, el chuflete lo eskriviyamos komo “Çuflete”. Ma despues mos konvensyeron ke esto no era djusto i los ke biviyan en payizes estranjeros no tenian la posibilidad de eskrivir este modo. I los ke no savian el turko no puedian meldar fasilmente. De akordo. Trokimos la dechizyon i dishimos ke devemos de eskrivir kon la ortografia de “Aki Yerushalayim”; i ay anyos ke estamos de la mizma idea. Para tener un akordo entre todos los sefardis kreo ke la mueva Akademia Nasyonal del Ladino en Israel - si va ser achetado por el Governo o la Knesset (no se la ley) - deve de formar un konsilyo internasyonal ande se pueden reunir unos kuantos dias al anyo para diskutir sovre estas ideas i partajar sus puntos de vista. Mizmo si es la Akademia ke va dar la desizyon, tomar ideas de los enteresados de esta lingua i kultura va enrikeser las desizyones.
Auguro una grande reushidad a la Akademia Nasyonal del Ladino en Israel ke va ser una de las tres akademias en las tierras santas.
