En la perasha Ahare nos enbeza el sirvisyo ke aze El Koen Gadol en el santuvaryo en el diya de la perdonansa Yom Kipur. Arambam en la mishna la eksplika dizyendo, ke kumplyo su sirvisyo, lo akonpanyavan asta su kaza, i aziya un banketo a sus keridos porke tornava a su kaza sano i rezyo.
El banketo ke aziya el Koen Gadol era por ke no se danyo en el santuvaryo la ora ke el izo su sirvisyo. Un Koen ke no era pertenesyente por azer el sirvisyo de el diya de las perdonansas no puediya salir bivo de el santuvaryo. I por esta razon es ke el Koen Gadol no deviya alargar su orasyon, por no azerlos dezesperar a el puevlo.
El banketo ke aziya el Koen Gadol en su kaza le enteresava a su persona. El Koen Gadol deviya ser kazado i orasyonar por su famiya i no solo por si. Antes de el diya de las perdonansas se deviya apartarse de kaza i santefikarse. Kuando ya izo su sirvisyo ke ya fue resivido de parte de el Todo Poderozo, tornava kon alegriya a su kaza, onde su famiya.
El sirvisyo ke aziya el Koen Gadol en diya de Kipur era por santefikar a el mundo el este. Tomar la santedad de las alturas i abasharla en el mundo onde bivimos nosotros. Ansi en tornando el Koen Gadol a su kaza trayiya kon si la santedad a su kaza i a el mundo.
Semejante a este sujeto lo rankontramos en Rabi Akiva ke es dicho por el, entro kon pas i salyo en pas. Rabi Akiva estudyo todos los sekretos de la Tora. Este estudyo no lo izo solamente para si solo sino, por enbezarlo a el mundo entero.
El eskopo de la kreasyon de el mundo es de azerle una morada a el Kriyador en este mundo por traer la santedad de las arturas a el mundo el este.
En el livro “Tana deve Eliyau” meldamos ansi dize el Kriyador a Israel, “yo kualo dezeo de vosotros? De amarvos unos kon otros, de onorarvos unos kon otros”. Komo el Kriyador se apiada kon todas las kriyansas, i nosotros devemos de apiadarmos de unos a los otros, seya moralmente seya materyalmente. Kada persona es presyoza verso el Kriyador, por ke es su kriyansa, i nosotros devemos apresyar a toda persona por ke todos somos kriyansas de el Todo Poderozo. Malgrado todos nos defektos el Kriyador syempre esta entre nosotros.
Ashohen itam betoh tumotam.
KEDOSHIM
El Todo Poderozo nos esta enkomenda dizyendo: Devesh ser santos, por ke yo so Santo. Sovre este sujeto kontinua la perasha, kada uno i uno devesh tener temor de vuestra madre i de vuestro padre i guadrar mis Shabatot. Kada persona i persona deve tener temor de su padre i de su madre. En los dyez komendamyentos, esta enkomendansa es dicho ‘Onora a tu padre i a tu madre’. Vemos ke “padre” esta sitado antes de madre. La kontinuasyon del verseto es ansi: “deves de guadrar a mis Shabatot”. Es defendido de esbivlar el Shabat. En la kreasyon de la persona egzisten tres faktores: el Kriyador, el padre i la madre. Por esta kavza es ke vino en un verseto la santedad de el Kriyador, i el konporto ke devemos tener verso nuestros djenitores. Devemos ser personas korektas i azer syempre lo ke esta djusto. Meldamos en la perasha, “delantre de uno ke no esta atinando no pozes un entronpeso, es muy siguro kavzas la kayida suya”. Esto se puede entender i en este senso alguna persona ke vino a tomar un konsejo en algun sujeto ke el inyora deves de aklararlo, dizirle lo ke es lo djusto i no entronpeserlo.
A el lavorante ke ya eskapo su lavoro de vista deves de pagar su paga i no azerlo sufriyir. Deves de estemar a tu kopanyero komo tu mismo. Estas enkomendansas ke meldamos en la Tora, trae a la konpanyia pas, repozo i trankilidad.
