Esta semana tomimos haber ke el Profesor Isaac Jerushalmi mos desho la buena vida. Era un savio. Konosia munchas kozas sovre muestra relijion. Ya se ke Karen ke lavoro en siertos projektos kon el va eskrivir un artikolo sovre el. Ke su alma repoze en Ganeden.
Malorozamente este mez tuvimos dos pedritas importantes. Selim Amado i el Prof. Isaac Jerushalmi. Los dos orijinaryos de la Turkiya i ke dyeron muncho a muestra kultura; la kultura de los sefardis turkanos. Kreo ke es una jenerasyon ke empeso a dispareserse. I mozotros devemos azer siertos esforsos para mantener muestra kultura. Ya se ke no es posivle de ser un savio komo el professor Jerushalmi ma kada uno puede azer una koza para la kultura sefardi turka.
Ay 50 diyas ke un grupo de WhatsApp fue formado por Karen-Henri i Emel i ke lavoran diya i noche para aparejar esta chika prezentasyon. Kualo se topa en esto? Biervos (ke reprezentan las kozas de un sujeto – pedasos del puerpo: kara, mano, ojo, oreja, kaveyos…). Las kozas ke empleamos en la kama, lo ke bevemos, lo ke komemos, los instrumentos ke empleamos en la meza, los diyas de la semana; los numeros i syertas konversasyones. (Si vuestros ijos keren partisipar a este sit de WhatsApp puedesh embiyar un mesaje a Karen Şarhon - 05424258176)
No se si lo savesh? Ma un grupo de WhatsApp puede tener en maksimum 256 personas. I fueron ovligados de formar un Segundo grupo porke se topa mas de 250 interesados para ambezar unos kuantos biervos en muestra lingua: en Djudezmo.
I reelmente esto muy kontente de ver este entereso de los mansevos para esta lingua. Ya savesh ke ay munchas personas ke tyenen el pasaporto espanyol. Ma oy en diya ay syertos mansevos i mansevas ke estan bivyendo i lavorando en Espanya.
Ya estamos penseryozos para el futuro de muestra lingua. Ma puedeser ke kon los ke se estan ambezando el Espanyol moderno vamos a tener mas munchas posibilidades para pueder konservar el Judeo-Espanyol.
