Ay unos kuantos mezes ke la Sinyora Terry Karalan ke bive en Londres estava organizando una ekspozisyon de ovras de arte de los artistos turkos sefardis.
La ambasada turka i su ambasador Abdurrahman Bilgiç, el institudo Yunus Emre, el Instituto Cervantes i muestro Sentro Sefaradi de Estanbol fueron las institusyones ke tomaron parte en esta aktividad. Mas de 100 ovras de 32 artistos/artistas de pintura, skultura, seramikes, minyatures, pachvorkes, bijuteria, i munchas otras kozas fueron ekspozadas en una galeria renomada. En la avyertura de esta ekspozisyon el Ambasador Bilgiç, el direktor del Instituto Yunus Emre, el Dr Karakuş, el direktor del Instituto Cervantes el sinyor Jimenes, el ministro solombra (gölge bakan) de pas i de desarmamyento (silahsızlanma) Uziell Hamilton tomaron la palavra avlando de la istoria de los Djudios Turkos, de muestra kultura, de esta organizasyon reushida, i de munchas otras kozas. El sinyor Ovadya ke reprezento el Sentro Sefaradi d’Estanbol avlo de los esforsos de la sinyora Katalan i de los Sefardis ke dominaron todo modo de Djudios en Turkia (Mizrahi, Romaniot i mizmo Ashkenazi).
Dospues de los diskorsos una damma kon un muzisyen mos kantaron syertas kantikas en judeo-espanyol.
Dospues de la seremoniya kuatro diferente ovras del pintor Jozef Habib Gerez fueron prezentados al Ambasador Bilhiç, a los sinyores Karakuş, Jimenez i Uziell Hamilton.
En este diya munchas personas ke biven en Londres i ke eran miembros de muestra komunidad estavan prezentes i fue una topadura de kosfuegros.
Los artistos ke partisiparon: Habib Gerez (pintura); İzzet Keribar (fotografia), Sara Aji - Dalya Anter Baruh - Mara Gülerşen - Sera İllel (seramika), Rubi Asa - Vladi Benbanaste - Kemal Eskenazi - Tanya Sisa (fotografiya), Röne Aziz - Lina Basmacı - Milen Franko - Sheila Gülman Niyego - Verda Habib - Süzet Haklı - Sara Hatem -Terry Katalan - Max Maçoro - Vivi Menase - Sara Özsarfati - Moris Sabaner - Esti Saul - Virna Mizrahi Saul (pintura); Eti Behar - Elda Fresko - Rosy Maçoro - Hilda Uziyel (Skulptura); Mira de Toledo Alev - Tima Varon (Echos de vitro); Sibel Hananel (mozaika); Rozita Kasuto (echos de emaye); Yvette Mizrahi (artista de djoyas). La ekspozisyon va ser avyerta fin a el 7 del mez de julio.
