Tu be-Av es el dia ke Dio pardono i deklaro ke los Judios, kuarenta anyos despues del dezierto, van a entrar a la Tierra Prometida...
Debasho del lunar en kinze, en los dias de enverano, Tu be-Av es un dia de bodas, de seremonias i amor...
La fiesta se selebra kon kantikas de amor, rozas koloradas i bayles i meldando la Tora, afuera de las paredes de Yerushalayim, leshos del monte del Templo, el lugar de la Destruksion.
UN FESTIVAL DE AMOR EN EL SENTRO DE YERUSHALAYIM - LAS MURAYAS FUERON LA FUENTE DE INSPIRASION.
Debasho del lunar en kinze, el los diyas de enverano, las mansevas o muchachas vistidas en blanko baylavan en los kampos; los mansevos no mankavan de ir a ver i oyir los kantes i bayles de las ermozas ijikas ke, atakanadas, bushkavan i esperavan enkontrar el novyo yakishikli, para formar una famiya...
Me imajino el tablo alegre... los fostanes blankos por la simplisidad i no dar importansa a las valores materiales.
En el Judaismo, el anyo Judio eskapa kon una selebrasion de amor - por la razon ke el Judaismo da grande importansa al amor en las relasiones.
Tu be-Av se selebra una semana despues de Tisha be-Av - el dia el mas triste de los Judios...
Tisha be-Av es el dia ke el Dio deklaro ke los Judios van a pasar kuarenta anyos en el dezierto porke avian konstruido un bekerro de oro i lo adoraron.
Tu be-Av se selebra solo una semana despues en las vinyas i se kanta: “Mansevos, alevantá los ojos i mirá kuala manseva vash a eskojer. No fiksesh los ojos solo en la ermozura. La ermozura solo vos puede enganyar, ma la mujer deve de tener amor del Dio Poderozo... Ma mirá ke la ija seya de buena famiya.”
Si se demanda: Por ke razon el anyo Judio se eskapa kon una selebrasion de amor?
Por la razon ke el Judaismo da muncha importansa al amor en las relasiones.
ES DE SUETAR: Siempre fiestas, alegrias, kon vuestros amantes - i pas, keridos lektores... El fransez dize:
APRES LA PLUIE, LE BEAU TEMPS... - despues de luvyas viene el tiempo ermozo.
