La semana pasada, de mierkoles la noche fina alhad a la tadre se realizo la mas grande ekspozisyon de arte en Estanbol. Es por la tredjena vez ke esta ekspozisyon topo lugar en muestra sivdad. De vez en kuando demandash si ay dos Estanboles diferentes. Porke ya puedesh ver muy grandes diferensyas en esta sivdad. Ay unos kuantos mezes ke se esta avlando de problemes ekonomikos muy emportantes. Las kazas ke se vendiyan a kuatroshentos mil dolares oy en diya tyenen una valor de manko de dosyentas mil dolares. Reelmente es un estado muy trajiko para los ke keren vender sus kazas o ke tyenen de menester de paras para sus echos.
Diya de alhad, dospues ke emplei los menesteres para mi madre, me fui a vijitarla. I dospues de la vijita me fui a esta ekspozisyon. Para entrar fui ovligado de asperar mas de media ora en la kola para pueder merkar un bilyeto para la entrada ke kostava bastante karo. Ma kreo ke todos se estan pasyonando para los artes i estan koryendo para pueder vijitar esta ekspozisyon. A la fin reushi a entrar i empesi a vijitar kada stand ke estava okupado por una galeria. Ke no vos pareska ke eran galerias de muestro pais. Avia galerias de kada pais: inglezas, fransezas, koreanas, japonezas, Afrikanas … Siertas vinieron del Chile, de la Austria, del Luxembourg, de la Italia, de la Romania, de la Olanda i munchos otros paizes.
Antes de la ekspozisyon disheron ke envitaron los koleksyoneres los mas emportantes de la Evropa. Porke komo la lira turka devaluo bastante kontra el dolar i el euro las ovras de los artistos turkos deven de vendersen a un presyo mas razonavle (si no kalkulan en euros). Ma kuando empesi a pasear vide ke la mas grande partida de las galerias i de los artistos no eran turkos. Avia artistos de todos los paizes. Reelmente kale felisitar a los organizatores de esta organizasion. Mirando los presyos una estatua ke me plazyo muncho se estava vendyendo a kuarenta i sinko miles de euros i una foto reelmente muy reushida a disyete mil euros. Espero ke las galerias ke vinieron de los kuatro puntos del mundo ganaron bastante en vendyendo estas ovras ekspozadas.
