La semana pasada fui a İzmir ande estava envitado para una prezentasyon / konferensya sovre el proyekto del Muzeo Djudio de İzmir. Kuando era Prezidente de la Komunidad Djudia, tuve agradavles relasyones kon los prezidentes i kon los dirijentes de la Komunidad de İzmir. Ay anyos ke esto sigiendo este proyekto. Estan lavorando kon una fondasyon Israelyana, Kiriaty ke los esta ayudando en munchos kavzos. Esta vez, la mas grande sorpreza era la prezensia del famozo arkitekto, Daniel Libeskind. Deke este arkitekto es tan famozo? Despues ke las dos buchukes (ikiz) torres de Nueva York fueron derrokadas en 2001, para reorganizar el terreno ande estavan estas torres se organizo una kompetisyon de arkitektura i es el arkitekto, Daniel Libeskind ke lo gano.
Si tuvitesh el privilejyo de vijitar la sivdad de Berlin i el Muzeo Djudio de esta sivdad, ya konosesh el arkitekto de este muzeo ke es Libeskind. Reelmente ocho mezes antes kuando vijiti esta sivdad, el Muzeo del Olokosto i el Muzeo Djudio mos empresyono muncho. Vijiti esta sivdad kon mi mujer i mi ijo. Kualo izo mas el arkitekto Libeskind: El Museo de Gerra Imperial en la Ingletierra, el proyekto para anchear (genişletme) el Muzeo de Arte de Danver, El Sentro de empleos (alışveriş merkezi) West Side en la Suis, El Museo Royal Ontario en Toronto, el teatro Grand Canal, El Sentro Sentral de la Kompanyia Hyundai en Seul. Savemos ke izo mizmo los planos de un grupo de kazas en Estambol -Nexus en Kartal en el anyo 2014.
Malorozamente antes de irme a esta envitasyon no fui bastante bivo para mirar en el internet ken es este arkitekto.
El prezidente de la Komunitad de İzmir, el sinyor Sami Azar dia entero estava kon este arkitekto, kon su mujer, kon la prezidente i el direktor de la Fondasyon Kiryaty, i el responsavle de la fondasyon “Jewish Heritage” para azer vijitar estas sinagogas ke se topan una al lado o serka de la otra en Kemeraltı, ke es el kuartyer vyejo ande se topavan los Djudios Izmirlis.
A la tadre, la envitasyon se realizo en la Sinagoga Portugeza ke fue restorada poko tyempo antes. I reelmente esta en una buena situasyon i kreo ke la restoraron asemejante al orijinal. Savemos ke esta sinagoga disparesyo despues de un fuego.
El alkalde de İzmir, el sinyor Aziz Kocaoğlu i el alkalde de Konak, la sinyora Sema Pekdaş estavan prontos en esta envitasyon. Esta nochada aviya tanta djente de la komunidad i de los envitados ke demandi a syertos dirijantes kualo es la populasyon djudia de İzmir. Vos parese ke son miles i miles. Azar prezento el proyekto avlando de la Sinagoga Shalom, la Sinagoga Ashkenaz Shalom, la Sinagoga Algazi, la Sinagoga Bikur Holim i la Sinagoga Sinyora. A estas sinagogas se adjunto la Sinagoga Portugeza i la Sinagoga Beit Hillel ke fueron restoradas. I se avlo de las sinagogas ke se deven de restorar: Etz Hayim, Hevra i Foresteros. Todas estas sinagogas son reelmente muy serkas mizmo siertas de estas son una al lado de la otra. A estas sinagogas se puede adjustar el edifisyo del Rabinato de İzmir.
Espero ke estas restorasyones se van terminar en poko tyempo i ke İzmir va resivir bastantes turistos kon este proyekto.
