Albania, ke selebra su Dia de Independensya el 28 de Noviembre, es un pais chiko de los Balkanes kon una populasyon djudia muy chika. Albania nunka fue un pais kon una populasyon grande djudia, ma djudios bivyeron aki durante siglos. Syertos istoriadores dizen ke un grupo chiko de djudios arivaron a esta rejyon un poko dospues del anyo 70, i los arkeologos deskuvriyeron en Seranda una fragua ke kreyen ke fue una sinagoga del siglo V. Ma una populasyon de djudios mas konsistyente en Albania tuvo lugar despues de la ekspulsion de Espanya en 1492, kuando la rejyon estava debasho el kontrol otomano. Los djudios espanyoles i portugezes se establisyeron en munchas sivdades albanesas. En 1673, el falso Mashiah, Shabbetai Zvi, fue egzilado a la sivdad portuaria de Ulqin, Albania (agora se yama Montenegro) de la parte del sultan otomano Mehmed IV, i muryo aya tres anyos despues.
La koza lo mas interesante de la istoryia djudia albanesa es ke avia aproksimamente 200 djudios en el país en el empesijo de la Segunda Guerra Mundial i serka de 2000 a la fin de la gerra! En 1937, kuando el antisemitizmo en la Evropa empeso a mostrar su kara preta, el governo de Albania kontinuo a rekonoser ofisyalamente la komunidad djudia. Dos anyos mas tadre, Albania entro debasho el kontrol italiano. Se promulgaron leyes fashistas ke limitavan la libertad de los djudios (i otras minoritas), ma la mayoria de los albaneses no aplikaron estas leyes. De otra parte, las ambasadas albanesas kontinuaron a dar visas a los djudios muncho mas despues ke otros países europeos aretaron las visas.
Syenes de djudios se fuyeron para refujiarsen en Albania, i el puevlo albanes no diferansyaron entre los refujiados i los djudios nativos del país. Kuando los almanes tomaron el kontrol del pais en 1943, demandaron una lista de djudios para empesar la deportasyon. Los governadores lokales no konformaron a esta demanda, i mas de esto empesaron a dar a los djudios dokumentos falsos.
El puevlo albanes, konformandose a su tradisyon de ospitalidad i “Besa” (palavras de onor) eskondyeron la mayoria de los djudios en las montanyas. Un nombre konsideravle de estos djudios lavoraron kon o para la resistensya, otros fueron eskortados a los puertos albaneses ande pudyeron fuyirsen. Yad Vashem rekonosyo a 69 albanezes komo “djustos entre las nasyones”.
Albania entro al Blok Komunista durante la Gerra Yelada (soğuk savaş), lo ke sinyifikava ke ambezar i pratikar la relijion era defendido. Despues de la kayida del komunizmo en la Evropa del Este en 1991, kaji todos los djudios de Albania se fuyeron. Oy solo kedaron unos 50 djudios, la mayoría de eyos bivyendo en Tirana, la kapital de Albania.
